سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم کو گردے کا درد (جو کہ پہلو کا درد ہے) ایک ماہ تک اس شدت سے لاحق رہتا کہ آپ صلی اللہ علیہ وسلم لوگوں کے پاس باہر تشریف لانے کی ہمت نہ پاتے تھے، اور میں نے آپ صلی اللہ علیہ وسلم کو دیکھا کہ آپ صلی اللہ علیہ وسلم تکلیف کی شدت سے بے چین ہوتے یہاں تک کہ میں آپ صلی اللہ علیہ وسلم کا دستِ مبارک تھام لیتی اور اس پر قرآن پڑھ کر دم کرتی، پھر اسے آپ صلی اللہ علیہ وسلم کے چہرہ انور پر پھیرتی تھی تاکہ اس کے ذریعے قرآن کی برکت اور آپ صلی اللہ علیہ وسلم کے اپنے ہاتھ کی برکت حاصل کروں، پس میں عرض کرتی: ”اے اللہ کے رسول صلی اللہ علیہ وسلم ! بلاشبہ آپ کی دعا قبول کی جاتی ہے، پس آپ اللہ سے دعا فرمائیں کہ وہ آپ سے اس تکلیف کو دور فرما دے جس میں آپ مبتلا ہیں۔“ تو آپ صلی اللہ علیہ وسلم فرماتے: ”اے عائشہ! مجھ پر لوگوں میں سب سے زیادہ سخت آزمائش آتی ہے۔“ [مسند أبي يعلى الموصلي/مسند عائشة/حدیث: 4769]