کُلَیْب رحمہ اللہ بیان کرتے ہیں کہ میں سیدنا علی رضی اللہ عنہ کی خدمت میں بیٹھا ہوا تھا کہ اسی اثنا میں ایک شخص آیا جس پر سفر کے آثار نمایاں تھے، اس نے عرض کی: ”اے امیر المؤمنین! کیا آپ مجھے گفتگو کی اجازت عطا فرمائیں گے؟“ سیدنا علی رضی اللہ عنہ اس وقت لوگوں سے محوِ گفتگو تھے، اس لیے اس کی طرف توجہ نہ فرما سکے۔ میں نے اس شخص سے اس کا حال دریافت کیا تو اس نے بتایا: ”میں عمرہ ادا کرنے گیا تھا تو وہاں میری ملاقات سیدہ عائشہ رضی اللہ عنہا سے ہوئی، انہوں نے مجھ سے پوچھا کہ وہ کون لوگ ہیں جو تمہارے علاقے سے نکلے ہیں اور انہیں 'حروریہ' کہا جاتا ہے؟ میں نے عرض کی کہ وہ 'حروراء' نامی بستی سے نکلے ہیں اس لیے اسی نام سے پکارے جاتے ہیں۔ انہوں نے پوچھا: کیا تم ان کی ہلاکت (یعنی ان سے ہونے والی جنگ) کے وقت موجود تھے؟ (راوی کہتے ہیں کہ) مجھے یاد نہیں کہ اس شخص نے 'ہاں' کہا یا 'نہیں۔' بہرحال سیدہ عائشہ رضی اللہ عنہا نے فرمایا: ”مبارکباد ہے اس شخص کے لیے جو ان کے قتل کے وقت حاضر رہا، اللہ کی قسم! اگر سیدنا علی بن ابی طالب رضی اللہ عنہ چاہتے تو تمہیں ان کے بارے میں (پوری) خبر دے دیتے۔“ چنانچہ میں اب ان ہی سے اس متعلق دریافت کرنے آیا ہوں۔“ جب سیدنا علی رضی اللہ عنہ فارغ ہوئے تو پوچھا: ”اجازت طلب کرنے والا شخص کہاں ہے؟“ اس نے وہی قصہ بیان کیا جو ہمیں سنایا تھا، جس پر سیدنا علی رضی اللہ عنہ نے دو مرتبہ «لَا إِلٰهَ إِلَّا اللّٰهُ» ”اللہ کے سوا کوئی معبودِ برحق نہیں“ اور «اللّٰهُ أَكْبَرُ» ”اللہ سب سے بڑا ہے“ کہا اور پھر فرمایا: ”میں رسول اللہ صلی اللہ علیہ وسلم کی خدمتِ اقدس میں حاضر ہوا تو وہاں ام المؤمنین سیدہ عائشہ رضی اللہ عنہا کے سوا کوئی دوسرا موجود نہ تھا، آپ صلی اللہ علیہ وسلم نے مجھ سے دریافت فرمایا: ”اے علی! تمہارا اس وقت کیا حال ہوگا جب ایک ایسی اور ایسی قوم نکلے گی؟“ میں نے عرض کی: ”اللہ اور اس کا رسول ہی بہتر جانتے ہیں۔“ تب آپ صلی اللہ علیہ وسلم نے اپنے دستِ مبارک سے اشارہ کرتے ہوئے فرمایا: ”ایک قوم مشرق کی طرف سے نمودار ہوگی، وہ قرآن کی تلاوت تو کریں گے مگر وہ ان کے حلق کے نیچے نہیں اترے گا، وہ دین سے اس طرح تیزی سے نکل جائیں گے جیسے تیر شکار کے پار نکل جاتا ہے، ان میں ایک ایسا آدمی ہوگا جس کا ایک ہاتھ ناقص (یعنی چھوٹا اور گوشت کا لوتھڑا سا) ہوگا گویا کہ وہ حبشی عورت کے پستان کی مانند ہے۔“ (پھر سیدنا علی رضی اللہ عنہ نے مجمع سے مخاطب ہو کر پوچھا:) ”میں تمہیں اللہ کا واسطہ دے کر پوچھتا ہوں، کیا میں نے تمہیں ان (خوارج) کے بارے میں پہلے نہیں بتایا تھا؟“ لوگوں نے عرض کی: ”جی ہاں۔“ آپ نے پھر پوچھا: ”میں تمہیں اللہ کا واسطہ دے کر پوچھتا ہوں، کیا میں نے تمہیں یہ نہیں بتایا تھا کہ وہ (مخصوص علامت والا) شخص انہی میں موجود ہے؟“ انہوں نے عرض کی: ”جی ہاں۔“ آپ نے فرمایا: ”پھر تم نے آکر مجھے بتایا تھا کہ وہ ان میں نہیں ہے تو میں نے تمہارے سامنے قسم کھا کر کہا تھا کہ وہ یقیناً انہی میں ہے؟“ انہوں نے عرض کی: ”جی ہاں۔“ آپ نے فرمایا: ”پھر تم اسے میرے پاس گھسیٹتے ہوئے لائے جبکہ اس کی حالت بالکل ویسی ہی تھی جیسا میں نے تمہارے سامنے اس کا وصف بیان کیا تھا؟“ انہوں نے عرض کی: ”جی ہاں۔“ اس پر آپ رضی اللہ عنہ نے فرمایا: ”اللہ اور اس کے رسول صلی اللہ علیہ وسلم نے سچ فرمایا۔““ [مسند أبي يعلى الموصلي/مسند علي بن أبي طالب رضي الله عنه/حدیث: 482]