سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم پر جادو کر دیا گیا، یہاں تک کہ صورتحال یہ ہو گئی کہ آپ صلی اللہ علیہ وسلم کو یہ خیال گزرتا کہ آپ نے کوئی کام کیا ہے حالانکہ حقیقت میں آپ نے وہ کام نہیں کیا ہوتا تھا، یہاں تک کہ ایک دن جب آپ صلی اللہ علیہ وسلم میرے پاس تشریف فرما تھے تو آپ صلی اللہ علیہ وسلم نے مسلسل اللہ عزوجل سے دعا مانگی، پھر فرمایا: ”اے عائشہ! کیا تمہیں معلوم ہوا کہ جس معاملے میں میں نے اللہ تعالیٰ سے رہنمائی چاہی تھی، اس نے مجھے جواب عطا فرما دیا ہے؟“ میں نے عرض کی: اے اللہ کے رسول! وہ کیا بات ہے؟ آپ صلی اللہ علیہ وسلم نے فرمایا: ”میرے پاس دو فرشتے آئے، ان میں سے ایک میرے سرہانے اور دوسرا میرے قدموں کی طرف بیٹھ گیا، پھر ایک نے اپنے ساتھی سے پوچھا: اس شخص کو کیا بیماری لاحق ہے؟ اس نے جواب دیا: ان پر جادو کیا گیا ہے، پہلے نے پوچھا: کس نے جادو کیا ہے؟ اس نے بتایا: بنی زریق کے ایک یہودی لبید بن اعصم نے، اس نے پوچھا: کس چیز میں جادو کیا ہے؟ اس نے بتایا: کنگھی اور کنگھی کرتے ہوئے گرنے والے بالوں میں، اس نے پوچھا: وہ کہاں ہے؟ اس نے جواب دیا: وہ ذو اروان نامی کنویں میں ہے“۔ سیدہ عائشہ رضی اللہ عنہا فرماتی ہیں کہ پھر نبی کریم صلی اللہ علیہ وسلم اپنے چند اصحاب کے ہمراہ اس کنویں پر تشریف لے گئے اور اسے ملاحظہ فرمایا، پھر واپس آکر مجھ سے فرمایا: ”اے عائشہ! اللہ کی قسم! اس کنویں کا پانی (سرخی مائل ہو کر) ایسا لگ رہا تھا جیسے مہندی کا نچوڑ ہو اور وہاں کے کھجور کے درختوں کے خوشے شیطانوں کے سروں کی مانند دکھائی دیتے تھے“۔ میں نے عرض کی: اے اللہ کے رسول! کیا آپ نے اس جادو کے سامان کو باہر نہیں نکالا؟ آپ صلی اللہ علیہ وسلم نے ارشاد فرمایا: ”نہیں، کیونکہ مجھے تو اللہ نے شفا اور عافیت عطا فرما دی تھی اور میں نے یہ ناپسند کیا کہ اس کی وجہ سے لوگوں میں کوئی شر یا فتنہ برپا کروں“۔ چنانچہ آپ صلی اللہ علیہ وسلم نے حکم دیا اور وہ کنواں بند کر دیا گیا۔ [مسند أبي يعلى الموصلي/مسند عائشة/حدیث: 4882]