سیدنا عبد اللہ بن مسعود رضی اللہ عنہ سے روایت ہے کہ انہوں نے بیان کیا ”میں عقبہ بن ابی معیط کی بکریاں چرانے والا ایک نو عمر لڑکا تھا کہ رسول اللہ صلی اللہ علیہ وسلم اور سیدنا ابوبکر صدیق رضی اللہ عنہ میرے پاس تشریف لائے اور آپ صلی اللہ علیہ وسلم نے دریافت فرمایا: «يَا غُلَامُ هَلْ مَعَكَ مِنْ لَبَنٍ؟» ”اے لڑکے! کیا تمہارے پاس کچھ دودھ ہے؟“ میں نے عرض کیا: ”جی ہاں! لیکن میں (ان کا) امانت دار ہوں۔“ آپ صلی اللہ علیہ وسلم نے فرمایا: «ائْتِنِي بِشَاةٍ لَمْ يَنْزُ عَلَيْهَا الْفَحْلُ» ”مجھے ایسی بکری لا کر دو جس پر ابھی نر نہ چڑھا ہو۔“ میں آپ صلی اللہ علیہ وسلم کے پاس ایک کم عمر یا ایک سالہ بکری لے آیا، رسول اللہ صلی اللہ علیہ وسلم نے اسے تھام لیا، پھر آپ صلی اللہ علیہ وسلم اس کے تھنوں کو مسح کرنے لگے اور دعا فرمانے لگے یہاں تک کہ تھنوں نے دودھ اتار دیا، پھر سیدنا ابوبکر رضی اللہ عنہ ایک (پیالہ نما) پتھر لائے جس میں آپ صلی اللہ علیہ وسلم نے دودھ دوہا، پھر آپ صلی اللہ علیہ وسلم نے سیدنا ابوبکر رضی اللہ عنہ سے فرمایا: «اشْرَبْ» ”تم پیو۔“ چنانچہ سیدنا ابوبکر رضی اللہ عنہ نے پیا اور ان کے بعد نبی کریم صلی اللہ علیہ وسلم نے نوش فرمایا، پھر آپ صلی اللہ علیہ وسلم نے تھن کو حکم دیا: «اقْلِصْ» ”سمٹ جا“، تو وہ سکڑ کر ویسا ہی ہو گیا جیسا پہلے تھا۔ ابن مسعود رضی اللہ عنہ کہتے ہیں کہ میں اس واقعے کے بعد نبی کریم صلی اللہ علیہ وسلم کی خدمت میں حاضر ہوا اور عرض کی: ”اے اللہ کے رسول! مجھے اس کلام یعنی اس قرآن میں سے کچھ سکھا دیجیے۔“ تو آپ صلی اللہ علیہ وسلم نے میرے سر پر دستِ شفقت پھیرا اور فرمایا: «إِنَّكَ غُلَامٌ مُعَلَّمٌ» ”یقیناً تم ایک سکھائے گئے (باصلاحیت) لڑکے ہو۔“ سیدنا ابن مسعود رضی اللہ عنہ فرماتے ہیں: ”چنانچہ میں نے آپ صلی اللہ علیہ وسلم کے دہنِ مبارک سے براہِ راست ستر سورتیں سیکھیں جن (کی صحت وقراءت) میں کوئی انسان مجھ سے جھگڑا نہیں کر سکتا۔“ [مسند أبي يعلى الموصلي/مسند عبد الله بن مسعود/حدیث: 4985]