سیدنا عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم نے مقامِ جعرانہ پر غنائمِ حنین تقسیم فرمائے، تو لوگ آپ صلی اللہ علیہ وسلم پر (کثرتِ ہجوم کے باعث) منڈلانے لگے جس پر آپ صلی اللہ علیہ وسلم نے ارشاد فرمایا: ”اللہ کے بندوں میں سے ایک بندہ (نبی) تھا جسے اللہ نے ایک قوم کی طرف بھیجا، تو انہوں نے اسے جھٹلایا، اسے مارا پیٹا اور اس کا سر زخمی کر دیا۔“ سیدنا عبداللہ رضی اللہ عنہ نے فرمایا کہ گویا میں اب بھی رسول اللہ صلی اللہ علیہ وسلم کو دیکھ رہا ہوں کہ آپ صلی اللہ علیہ وسلم کجاوے کے پاس (بیٹھے ہوئے ان لوگوں کا تذکرہ فرما رہے) تھے اور آپ صلی اللہ علیہ وسلم نے اس طرح فرمایا: «رَبِّ اغْفِرْ لِقَوْمِي فَإِنَّهُمْ لَا يَعْلَمُونَ» ”اے میرے رب! میری قوم کی مغفرت فرما دے کیونکہ وہ نادان ہیں۔“ اور (اس کے ایک راوی) ابو سعید القواريري رحمہ اللہ نے (اس کیفیت کو بیان کرتے ہوئے) اپنے انگوٹھے کو اپنی پیشانی پر پھیرا گویا وہ کسی چیز (خون وغیرہ) کو صاف کر رہے ہوں۔ [مسند أبي يعلى الموصلي/مسند عبد الله بن مسعود/حدیث: 4992]