سیدنا عبد اللہ بن مسعود رضی اللہ عنہ سے روایت ہے کہ انہوں نے فرمایا: ”میں آلِ ابی معیط کی بکریاں چرا رہا تھا کہ نبی کریم صلی اللہ علیہ وسلم میرے پاس تشریف لائے اور آپ صلی اللہ علیہ وسلم کے ہمراہ سیدنا ابوبکر بن ابی قحافہ رضی اللہ عنہ بھی تھے، نبی کریم صلی اللہ علیہ وسلم نے دریافت فرمایا: ”اے لڑکے! کیا تمہارے پاس کچھ دودھ ہے جو تم ہمیں پلا سکو؟“ میں نے عرض کیا: جی ہاں! لیکن میں (ان کا) امانت دار ہوں، آپ صلی اللہ علیہ وسلم نے فرمایا: ”کیا تمہارے پاس کوئی ایسی جوان بھیڑ ہے جس پر ابھی تک نر نہ چڑھا ہو؟“ میں نے عرض کیا: جی ہاں! پھر میں آپ صلی اللہ علیہ وسلم کے پاس ایسی ہی ایک کم عمر بھیڑ لے آیا جس کے ابھی تھن بھی ظاہر نہیں ہوئے تھے، تو نبی کریم صلی اللہ علیہ وسلم نے تھنوں کی جگہ پر اپنا دستِ مبارک پھیرا حالانکہ وہاں تھنوں کا نام و نشان نہ تھا، تو اچانک وہ مقام ابھر کر دودھ سے لبریز ہو گیا، میں آپ صلی اللہ علیہ وسلم کے پاس ایک پیالے نما گہرا پتھر لے آیا، آپ صلی اللہ علیہ وسلم نے اس میں دودھ دوہا، پھر سیدنا ابوبکر رضی اللہ عنہ کو پلایا، مجھے پلایا اور پھر خود نوش فرمایا، اس کے بعد آپ صلی اللہ علیہ وسلم نے اس عضو سے فرمایا: «اقْلِصْ» ”سکڑ جا“، تو وہ اپنی اصل حالت پر لوٹ گیا، سیدنا عبد اللہ بن مسعود رضی اللہ عنہ فرماتے ہیں کہ میں نے رسول اللہ صلی اللہ علیہ وسلم کا یہ معجزہ اپنی آنکھوں سے دیکھا، پھر میں نے عرض کیا: یا رسول اللہ صلی اللہ علیہ وسلم ! مجھے بھی (کچھ) سکھا دیجیے، تو آپ صلی اللہ علیہ وسلم نے میرے سر پر اپنا دستِ مبارک پھیرا اور فرمایا: «بَارِكَ اللَّهُ فِيكَ» ”اللہ تعالیٰ تم میں برکت فرمائے“، ”بے شک تم ایک سکھائے ہوئے لڑکے ہو“، چنانچہ میں اسلام لے آیا۔“ پھر میں نبی کریم صلی اللہ علیہ وسلم کی خدمت میں حاضر ہوا، ایک مرتبہ ہم حرا (پہاڑ) پر آپ صلی اللہ علیہ وسلم کے پاس تھے کہ آپ صلی اللہ علیہ وسلم پر سورۃ المرسلات نازل ہوئی، میں نے اسے (آپ صلی اللہ علیہ وسلم سے سن کر) یاد کر لیا جبکہ آپ صلی اللہ علیہ وسلم کا دہنِ مبارک ابھی اس کی تلاوت سے تر تھا، مجھے یاد نہیں کہ یہ سورت ان دو آیتوں میں سے کس پر ختم ہوئی: ﴿وَإِذَا قِيلَ لَهُمُ ارْكَعُوا لَا يَرْكَعُونَ﴾ (اور جب ان سے کہا جاتا ہے کہ رکوع کرو تو وہ رکوع نہیں کرتے) [المرسلات: 48] یا ﴿فَبِأَيِّ حَدِيثٍ بَعْدَهُ يُؤْمِنُونَ﴾ (پھر اس کے بعد وہ کس بات پر ایمان لائیں گے؟) [المرسلات: 50] ۔ میں نے رسول اللہ صلی اللہ علیہ وسلم کے دہنِ مبارک سے ستر سورتیں حاصل کیں اور باقی قرآن آپ صلی اللہ علیہ وسلم کے صحابہ سے حاصل کیا۔ وہ فرماتے ہیں: ایک مرتبہ ہم حرا پر سو رہے تھے کہ ہمیں نبی کریم صلی اللہ علیہ وسلم کی اس بات ہی نے بیدار کیا: ”جس نے اسے تم سے روکا اسی نے تمہیں اس سے بچا لیا۔“ ہم نے عرض کیا: ”اے اللہ کے رسول! وہ کیا تھا؟“ آپ صلی اللہ علیہ وسلم نے فرمایا: ”ایک سانپ تھا جو پہاڑ کی جانب سے نکلا تھا۔“ [مسند أبي يعلى الموصلي/مسند عبد الله بن مسعود/حدیث: 5096]