سیدنا علی رضی اللہ عنہ سے روایت ہے (جسے سعید بن المسیب رحمہ اللہ نے ان سے نقل کیا ہے) کہ انہوں نے ایک مرتبہ کھانا تیار کیا اور رسول اللہ صلی اللہ علیہ وسلم کی دعوت کی، (جب آپ صلی اللہ علیہ وسلم تشریف لائے) تو آپ نے گھر میں کوئی ایسی چیز دیکھی جس پر تصویریں نقش تھیں، چنانچہ آپ صلی اللہ علیہ وسلم (اندر تشریف لانے کے بجائے) واپس پلٹ گئے۔ سیدنا علی رضی اللہ عنہ بیان کرتے ہیں کہ میں نے عرض کیا: ”اے اللہ کے رسول صلی اللہ علیہ وسلم ! میرے ماں باپ آپ پر قربان ہوں، آپ کس وجہ سے واپس لوٹ گئے؟“ آپ صلی اللہ علیہ وسلم نے ارشاد فرمایا: ”گھر میں ایک ایسا پردہ موجود ہے جس پر تصویریں بنی ہوئی ہیں، اور یقیناً فرشتے اس گھر میں داخل نہیں ہوتے جس میں تصویریں ہوں۔“ [مسند أبي يعلى الموصلي/مسند علي بن أبي طالب رضي الله عنه/حدیث: 521]