سیدنا عبداللہ بن مسعود رضی اللہ عنہ سے روایت ہے کہ انہوں نے فرمایا: ”میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم (نماز کے دوران) ہر مرتبہ جھکتے، اٹھتے اور قیام کے لیے کھڑے ہوتے وقت تکبیر کہتے تھے، اور آپ صلی اللہ علیہ وسلم اپنے دائیں اور بائیں جانب «السَّلَامُ عَلَيْكُمْ وَرَحْمَةُ اللَّهِ، السَّلَامُ عَلَيْكُمْ وَرَحْمَةُ اللَّهِ» ”تم پر سلامتی اور اللہ کی رحمت ہو، تم پر سلامتی اور اللہ کی رحمت ہو“ کہتے ہوئے سلام پھیرتے تھے، یہاں تک کہ میں آپ صلی اللہ علیہ وسلم کے رخساروں کی سفیدی دیکھ لیتا تھا، اور میں نے سیدنا ابوبکر اور سیدنا عمر رضی اللہ عنہما کو بھی اسی طرح (نماز ادا) کرتے ہوئے دیکھا۔“ [مسند أبي يعلى الموصلي/مسند عبد الله بن مسعود/حدیث: 5334]