سیدنا عبداللہ رضی اللہ عنہ سے روایت ہے کہ ایک شخص نبی کریم صلی اللہ علیہ وسلم کی بارگاہ میں حاضر ہوا اور عرض کیا: ”میں نے باغ میں ایک عورت کے ساتھ (خلوت میں) وہ سب کچھ کیا جو ایک مرد عورت کے ساتھ کرتا ہے سوائے اس کے کہ میں نے اس سے جماع نہیں کیا، اب آپ میرے بارے میں جو چاہیں حکم صادر فرمائیں (تاکہ میرا کفارہ ہو جائے)۔“ رسول اللہ صلی اللہ علیہ وسلم نے اسے کچھ نہ فرمایا اور وہ شخص واپس چلا گیا، پھر آپ صلی اللہ علیہ وسلم نے اسے دوبارہ بلایا اور اسے یہ آیتِ کریمہ پڑھ کر سنائی: ﴿أَقِمِ الصَّلَاةَ طَرَفَيِ النَّهَارِ وَزُلَفًا مِنَ اللَّيْلِ إِنَّ الْحَسَنَاتِ يُذْهِبْنَ السَّيِّئَاتِ ذَلِكَ ذِكْرَى لِلذَّاكِرِينَ﴾ ”اور آپ دن کے دونوں حصوں میں اور رات کی چند ساعتوں میں نماز قائم کریں، یقیناً نیکیاں برائیوں کو دور کر دیتی ہیں، یہ نصیحت ماننے والوں کے لیے ایک بڑی نصیحت ہے۔“ [مسند أبي يعلى الموصلي/مسند عبد الله بن مسعود/حدیث: 5343]