سیدنا عبداللہ بن مسعود رضی اللہ عنہ سے روایت ہے کہ ”رسول اللہ صلی اللہ علیہ وسلم نے مجھے تشہد اس طرح سکھایا کہ میرا ہاتھ آپ صلی اللہ علیہ وسلم کی دونوں ہتھیلیوں کے درمیان تھا، بالکل اسی طرح جیسے آپ صلی اللہ علیہ وسلم مجھے قرآن کی کوئی سورت سکھایا کرتے تھے: «التَّحِيَّاتُ لِلَّهِ وَالصَّلَوَاتُ وَالطَّيِّبَاتُ، السَّلَامُ عَلَيْكَ أَيُّهَا النَّبِيُّ وَرَحْمَةُ اللَّهِ وَبَرَكَاتُهُ، السَّلَامُ عَلَيْنَا وَعَلَى عِبَادِ اللَّهِ الصَّالِحِينَ، أَشْهَدُ أَنْ لَا إِلَهَ إِلَّا اللَّهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ» ”تمام قولی، بدنی اور مالی عبادتیں اللہ ہی کے لیے ہیں، اے نبی! آپ پر سلامتی ہو اور اللہ کی رحمت اور اس کی برکتیں نازل ہوں، سلامتی ہو ہم پر اور اللہ کے تمام نیک بندوں پر، میں گواہی دیتا ہوں کہ اللہ کے سوا کوئی معبودِ برحق نہیں اور میں گواہی دیتا ہوں کہ محمد ( صلی اللہ علیہ وسلم ) اللہ کے بندے اور اس کے رسول ہیں“۔“ سیدنا ابن مسعود رضی اللہ عنہ فرماتے ہیں کہ ”یہ (الفاظ) اس وقت تھے جب آپ صلی اللہ علیہ وسلم ہمارے درمیان موجود تھے، پھر جب آپ صلی اللہ علیہ وسلم کی روحِ مبارک قبض کر لی گئی تو ہم ”السَّلَامُ عَلَى النَّبِيِّ صلی اللہ علیہ وسلم “ (نبی صلی اللہ علیہ وسلم پر سلام ہو) کہنے لگے۔“ [مسند أبي يعلى الموصلي/مسند عبد الله بن مسعود/حدیث: 5347]