سیدنا عبداللہ بن عمر رضی اللہ عنہما سے روایت ہے کہ سیدنا غیلان بن سلمہ ثقفی رضی اللہ عنہ جب مشرف بہ اسلام ہوئے تو ان کے نکاح میں دس بیویاں تھیں، چنانچہ رسول اللہ صلی اللہ علیہ وسلم نے ان سے ارشاد فرمایا: ”ان میں سے چار کو منتخب کر لو۔“ پھر جب سیدنا عمر رضی اللہ عنہ کا دورِ خلافت آیا تو انہوں نے اپنی بیویوں کو طلاق دے دی اور اپنا مال اپنے بیٹوں کے درمیان تقسیم کر دیا، جب یہ اطلاع سیدنا عمر رضی اللہ عنہ تک پہنچی تو انہوں نے ان سے ملاقات کی اور فرمایا: ”میرا خیال ہے کہ شیطان نے آسمانی خبریں اچکنے کے دوران تمہاری موت کی خبر سنی اور اسے تمہارے دل میں ڈال دیا ہے، اور شاید اب تمہارا (دنیا میں) قیام تھوڑی ہی دیر ہے۔ اللہ کی قسم! تم اپنی بیویوں سے رجوع کرو اور اپنا مال بھی واپس لو، ورنہ میں ان بیویوں کو تمہارا وارث بنا دوں گا اور تمہاری قبر کے بارے میں ایسا حکم دوں گا کہ اس پر ویسے ہی پتھر برسائے جائیں گے جیسے ابورغال کی قبر پر برسائے گئے تھے۔“ [مسند أبي يعلى الموصلي/مسند عبد الله بن عمر/حدیث: 5437]