سالم بن عبد اللہ رحمہ اللہ سے روایت ہے کہ انہوں نے ملکِ شام کے ایک باشندے کو سیدنا عبد اللہ بن عمر رضی اللہ عنہما سے حج کے ساتھ عمرہ کا فائدہ اٹھانے (حجِ تمتع) کے متعلق سوال کرتے ہوئے سنا، تو سیدنا عبد اللہ رضی اللہ عنہ نے فرمایا: ”یہ حلال ہے“، اس شامی شخص نے کہا کہ آپ کے والدِ محترم نے تو اس سے منع فرمایا تھا؟ سیدنا عبد اللہ رضی اللہ عنہ نے (جواباً) فرمایا: ”تمہارا کیا خیال ہے، اگر میرے والد نے اس سے منع کیا ہو اور رسول اللہ صلی اللہ علیہ وسلم نے اسے خود کیا ہو، تو کیا تم میرے والد کے حکم کی پیروی کرو گے یا رسول اللہ صلی اللہ علیہ وسلم کے حکم کی؟“ اس شخص نے عرض کیا کہ بلکہ رسول اللہ صلی اللہ علیہ وسلم کے حکم کی، تو سیدنا عبد اللہ رضی اللہ عنہ نے فرمایا: ”یقیناً رسول اللہ صلی اللہ علیہ وسلم نے اسے خود کیا ہے“۔ [مسند أبي يعلى الموصلي/مسند عبد الله بن عمر/حدیث: 5563]