سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے اہل طائف کا محاصرہ فرمایا لیکن ان سے (فتح و غلبہ کی صورت میں) کچھ حاصل نہ ہو سکا تو آپ صلی اللہ علیہ وسلم نے ارشاد فرمایا: ”ان شاء اللہ، اب ہم واپس لوٹنے والے ہیں“، اس پر صحابہ کرام رضی اللہ عنہم نے عرض کیا کہ کیا ہم فتح حاصل کیے بغیر ہی واپس پلٹ جائیں؟ تو رسول اللہ صلی اللہ علیہ وسلم نے ان سے ارشاد فرمایا: ”اچھا تو پھر صبح سویرے قتال کے لیے نکلو“، چنانچہ وہ صبح سویرے لڑائی کے لیے نکلے لیکن انہیں کثرت سے زخم آئے، تب رسول اللہ صلی اللہ علیہ وسلم نے فرمایا: ”ہم کل واپس روانہ ہوں گے“، یہ بات صحابہ کرام رضی اللہ عنہم کو بہت پسند آئی تو رسول اللہ صلی اللہ علیہ وسلم (ان کی اس کیفیت کو دیکھ کر) مسکرا دیے۔ [مسند أبي يعلى الموصلي/مسند عبد الله بن عمر/حدیث: 5773]