سیدنا ابن عمر رضی اللہ عنہما سے روایت ہے کہ انہوں نے فرمایا: ”ہم کبیرہ گناہ کرنے والوں کے لیے استغفار کرنے سے رکے رہتے تھے، یہاں تک کہ ہم نے رسول اللہ صلی اللہ علیہ وسلم کو (یہ آیت) تلاوت فرماتے ہوئے سنا: ﴿إِنَّ اللَّهَ لَا يَغْفِرُ أَنْ يُشْرَكَ بِهِ وَيَغْفِرُ مَا دُونَ ذَلِكَ لِمَنْ يَشَاءُ﴾ ”بے شک اللہ اس بات کو معاف نہیں کرتا کہ اس کے ساتھ کسی کو شریک ٹھہرایا جائے اور اس کے علاوہ (گناہ) جس کے لیے چاہے معاف فرما دیتا ہے“ اور آپ صلی اللہ علیہ وسلم نے ارشاد فرمایا: ”بے شک میں نے اپنی (مقبول) دعا کو اپنی امت کے کبیرہ گناہ کرنے والوں کی شفاعت کے لیے ذخیرہ کر رکھا ہے“، پس ہم ان بہت سے (سخت) خیالات سے باز آ گئے جو ہمارے دلوں میں (گناہ گاروں کے متعلق) تھے، پھر اس کے بعد ہم نے (ان کے حق میں) زبان کھولی اور اللہ کی رحمت کی امید رکھی۔“ [مسند أبي يعلى الموصلي/مسند عبد الله بن عمر/حدیث: 5813]