سیدنا ابوہریرہ رضی اللہ عنہ سے روایت ہے کہ سیدنا عیینہ بن حصن الفزاری رضی اللہ عنہ رسول اللہ صلی اللہ علیہ وسلم کی خدمت میں حاضر ہوئے تو انہوں نے آپ صلی اللہ علیہ وسلم کو سیدنا حسن اور سیدنا حسین رضی اللہ عنہما کا بوسہ لیتے ہوئے دیکھا، انہوں نے عرض کیا: ”اے اللہ کے رسول صلی اللہ علیہ وسلم ! کیا آپ ان کا بوسہ لیتے ہیں؟ میرے ہاں دس اولادیں ہوئیں لیکن میں نے ان میں سے کبھی کسی کا بوسہ نہیں لیا۔“ تب رسول اللہ صلی اللہ علیہ وسلم نے ارشاد فرمایا: ”جو رحم نہیں کرتا، اس پر رحم نہیں کیا جاتا۔“ [مسند أبي يعلى الموصلي/مسند أبي هريرة رضي الله عنه/حدیث: 5892]