سیدنا ابو ہریرہ رضی اللہ عنہ سے روایت ہے کہ ایک دن رسول اللہ صلی اللہ علیہ وسلم کے پاس ایک مہمان آیا، آپ صلی اللہ علیہ وسلم نے اپنی ازواجِ مطہرات کے پاس پیغام بھیجا کہ ”کیا تمہارے پاس کوئی چیز ہے؟ کیونکہ آج رات میرے پاس ایک مہمان آیا ہے“، انہوں نے آپ صلی اللہ علیہ وسلم کی طرف جواب بھیجا کہ ”نہیں، اس ذات کی قسم جس نے آپ کو حق کے ساتھ مبعوث فرمایا! ہمارے پاس پانی کے سوا کچھ نہیں ہے“، راوی کہتے ہیں کہ اسی اثنا میں ایک انصاری صحابی آئے تو اللہ کے نبی صلی اللہ علیہ وسلم نے فرمایا: ”کیا تمہارے پاس کوئی ایسی چیز ہے کہ آج رات ہمارے اس مہمان کو اپنے ساتھ لے جاؤ؟“ انصاری رضی اللہ عنہ نے عرض کیا: ”جی ہاں اے اللہ کے نبی صلی اللہ علیہ وسلم !“، چنانچہ وہ مہمان کو لے کر چل دیے، جب وہ اپنے گھر پہنچے تو اپنی زوجہ سے پوچھا: ”کیا تمہارے پاس (کھانے کو) کوئی چیز ہے؟“ انہوں نے کہا: ”جی ہاں، ہمارے پاس صرف ایک روٹی ہے“، انہوں نے کہا: ”تم ایسا کرنا کہ چراغ درست کرنے کے بہانے اسے بجھا دینا اور روٹی سامنے رکھ دینا“، پھر وہ اور ان کی زوجہ مہمان کے ساتھ (کھانے کے لیے) اپنا ہاتھ برتن میں ڈالنے لگے اور اپنے ہاتھ اپنے مونہوں تک لے جاتے (جیسے کھانا کھا رہے ہوں) حالانکہ وہ کچھ نہیں کھا رہے تھے، انہوں نے مہمان کو روٹی کھانے کے لیے تنہا چھوڑ دیا اور اس نے وہ روٹی کھا لی، جب صبح ہوئی تو مہمان اپنی ضرورت کے لیے روانہ ہو گیا، انصاری رضی اللہ عنہ بیان کرتے ہیں کہ جب میرے رسول اللہ صلی اللہ علیہ وسلم کی خدمت میں حاضر ہونے کا وقت ہوا تو میں آپ صلی اللہ علیہ وسلم کے پاس آیا، آپ صلی اللہ علیہ وسلم نے مجھے دور سے دیکھا اور دریافت فرمایا: ”تم نے گزشتہ رات اپنے مہمان کے ساتھ کیا سلوک کیا تھا؟“ وہ کہتے ہیں کہ میں نے گمان کیا کہ شاید مہمان نے رسول اللہ صلی اللہ علیہ وسلم سے میری شکایت کر دی ہے، چنانچہ میں نے عرض کیا: ”یا رسول اللہ! میں نے تو اس طرح اور اس طرح کیا تھا“، آپ صلی اللہ علیہ وسلم نے فرمایا: ”میرے پاس جبرائیل علیہ السلام آئے اور انہوں نے مجھے خبر دی کہ تمہارے رب نے تمہارے اس فعل پر جو تم نے اپنے مہمان کے ساتھ کیا، تعجب فرمایا ہے - یا فرمایا کہ: (اللہ تعالیٰ) ہنس دیے ہیں -“۔ [مسند أبي يعلى الموصلي/تابع مسند أبي هريرة رضي الله عنه/حدیث: 6182]