سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”بنی اسرائیل کی قیادت و سیاست ان کے انبیاء خود کیا کرتے تھے، جب بھی کوئی نبی رحلت فرما جاتا تو دوسرا نبی اس کا جانشین بن جاتا، اور حقیقت یہ ہے کہ میرے بعد تمہارے درمیان اب کوئی نبی نہیں ہوگا“، صحابہ کرام رضی اللہ عنہم نے عرض کیا: یا رسول اللہ صلی اللہ علیہ وسلم ! پھر کیا ہوگا؟ آپ صلی اللہ علیہ وسلم نے فرمایا: ”عنقریب خلفاء ہوں گے اور وہ تعداد میں بہت ہوں گے“، صحابہ نے عرض کیا: (ان کے اختلافات کے وقت) ہم کیا کریں؟ آپ صلی اللہ علیہ وسلم نے ارشاد فرمایا: ”تم ایک کے بعد ایک، پہلے خلیفہ کی بیعت و عہد کو پورا کرنا اور ان کا جو حق تم پر لازم ہے اسے ادا کرنا، یقیناً اللہ تعالیٰ ان سے ان کی رعایا کی ذمہ داریوں کے بارے میں سوال فرمائے گا“، اور عثمان رحمہ اللہ کی روایت میں «يَسُوسُهُمُ الْأَنْبِيَاءُ» کے الفاظ مروی ہیں۔ [مسند أبي يعلى الموصلي/تابع مسند أبي هريرة رضي الله عنه/حدیث: 6211]