سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”کون ہے جو مجھ سے یہ کلمات سیکھ لے تاکہ وہ خود ان پر عمل کرے یا اسے سکھائے جو ان پر عمل پیرا ہو؟“ سیدنا ابوہریرہ رضی اللہ عنہ بیان کرتے ہیں کہ میں نے عرض کیا: اے اللہ کے رسول صلی اللہ علیہ وسلم ! میں حاضر ہوں۔ آپ صلی اللہ علیہ وسلم نے میرا ہاتھ پکڑا اور پانچ باتیں شمار کراتے ہوئے ارشاد فرمایا: «اتَّقِ الْمَحَارِمَ تَكُنْ أَعْبَدَ النَّاسِ» ”اللہ کی حرام کردہ چیزوں سے بچو تو تم لوگوں میں سب سے بڑے عبادت گزار بن جاؤ گے،“ «وَارْضَ بِمَا قَسَمَ اللَّهُ لَكَ تَكُنْ أَغْنَى النَّاسِ» ”اللہ نے تمہارے مقدر میں جو کچھ لکھ دیا ہے اس پر راضی رہو تو تم سب سے زیادہ غنی بن جاؤ گے،“ «وَأَحْسِنْ إِلَى جَارِكَ تَكُنْ مُؤْمِنًا» ”اپنے پڑوسی کے ساتھ حسنِ سلوک کرو تو تم (کامل) مومن بن جاؤ گے،“ «وَأَحِبَّ لِلنَّاسِ مَا تُحِبُّ لِنَفْسِكَ تَكُنْ مُسْلِمًا» ”لوگوں کے لیے وہی چیز پسند کرو جو اپنے لیے پسند کرتے ہو تو تم (کامل) مسلمان بن جاؤ گے،“ «وَلَا تُكْثِرِ الضَّحِكَ فَإِنَّ كَثْرَةَ الضَّحِكِ تُمِيتُ الْقَلْبَ» ”اور زیادہ مت ہنسا کرو کیونکہ زیادہ ہنسنا دل کو مردہ کر دیتا ہے۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6240]