سیدنا ابوہریرہ رضی اللہ عنہ سے روایت ہے کہ ایک شخص رسول اللہ صلی اللہ علیہ وسلم کی خدمتِ اقدس میں حاضر ہوا اور عرض کی کہ ”میں تو ہلاک ہو گیا“، آپ صلی اللہ علیہ وسلم نے دریافت فرمایا: ”وہ کیا بات ہے؟“ اس نے عرض کی کہ ”میں نے رمضان (کے روزے) میں اپنی اہلیہ سے ہم بستری کر لی ہے“، آپ صلی اللہ علیہ وسلم نے فرمایا: ”ایک غلام آزاد کرو“، اس نے عرض کی کہ ”میں اس کی استطاعت نہیں رکھتا“، آپ صلی اللہ علیہ وسلم نے فرمایا: ”پھر ایک اونٹ بطور ہدیہ (قربانی) پیش کرو“، اس نے عرض کی کہ ”میں اس کی بھی قدرت نہیں رکھتا“، آپ صلی اللہ علیہ وسلم نے فرمایا: ”بیٹھ جاؤ“، اسی اثنا میں ایک صاحب نے آپ صلی اللہ علیہ وسلم کو کوئی چیز پیش کی تو آپ صلی اللہ علیہ وسلم نے اس سائل سے فرمایا: ”اسے (اپنی طرف سے) صدقہ کر دو، یہ تمہاری جانب سے کافی ہو جائے گا“، اس نے عرض کی: ”اے اللہ کے رسول صلی اللہ علیہ وسلم ! میرے اہل و عیال سے زیادہ کوئی اس کا محتاج نہیں ہے“، راوی بیان کرتے ہیں کہ پھر رسول اللہ صلی اللہ علیہ وسلم کے پاس انیس، بیس یا اکیس صاع (غلہ) لایا گیا تو آپ صلی اللہ علیہ وسلم نے وہ اسے عطا کر دیا اور فرمایا: ”یہ تمہارے اور تمہارے اہل و عیال کے لیے ہے“۔ [مسند أبي يعلى الموصلي/تابع مسند أبي هريرة رضي الله عنه/حدیث: 6368]