سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے دریافت فرمایا: ”کیا تم جانتے ہو کہ غیبت کیا ہے؟“ صحابہ کرام رضی اللہ عنہم نے عرض کیا: ”اللہ اور اس کا رسول صلی اللہ علیہ وسلم ہی بہتر جانتے ہیں۔“ آپ صلی اللہ علیہ وسلم نے ارشاد فرمایا: ”تمہارا اپنے بھائی کا تذکرہ اس انداز میں کرنا جو اسے ناگوار گزرے۔“ عرض کیا گیا: ”بھلا یہ بتائیے کہ اگر میرے بھائی میں وہ عیب موجود ہو جو میں بیان کر رہا ہوں (تب بھی کیا یہ غیبت ہے)؟“ آپ صلی اللہ علیہ وسلم نے فرمایا: ”اگر اس میں وہ بات موجود ہو جو تم کہہ رہے ہو تو یقیناً تم نے اس کی غیبت کی، اور اگر وہ بات اس میں موجود نہ ہو تو پھر تم نے اس پر بہتان تراشی کی۔“ [مسند أبي يعلى الموصلي/تابع مسند أبي هريرة رضي الله عنه/حدیث: 6493]