سیدنا ابوہریرہ رضی اللہ عنہ سے روایت ہے کہ صحابہ کرام نے عرض کیا: ”اے اللہ کے رسول صلی اللہ علیہ وسلم ! کیا ہم قیامت کے دن اپنے رب کا دیدار کریں گے؟“ آپ صلی اللہ علیہ وسلم نے ارشاد فرمایا: ”کیا تمہیں چودھویں رات کا چاند دیکھنے میں کوئی دشواری پیش آتی ہے جبکہ اس کے سامنے بادل نہ ہوں؟“ انہوں نے عرض کیا: ”جی نہیں۔“ آپ صلی اللہ علیہ وسلم نے فرمایا: ”کیا تمہیں دوپہر کے وقت سورج دیکھنے میں کوئی مشکل ہوتی ہے جبکہ اس کے آگے بادل نہ ہوں؟“ انہوں نے عرض کیا: ”نہیں۔“ آپ صلی اللہ علیہ وسلم نے ارشاد فرمایا: ”پس اس ذات کی قسم جس کے دستِ قدرت میں محمد صلی اللہ علیہ وسلم کی جان ہے! تم اپنے رب کو اسی طرح دیکھو گے جس طرح تم ان دونوں کو دیکھتے ہو۔“ یہ طویل حدیث کا ایک حصہ (الحدیث) ہے۔ [مسند أبي يعلى الموصلي/تابع مسند أبي هريرة رضي الله عنه/حدیث: 6689]