ابو التیاح رحمہ اللہ سے روایت ہے کہ ایک شخص نے سیدنا عبد الرحمن بن حبشی رضی اللہ عنہ سے—جو کہ ایک سن رسیدہ بزرگ تھے—سوال کیا کہ ”اے ابنِ حبشی! رسول اللہ صلی اللہ علیہ وسلم نے اس وقت کیا کیا تھا جب شیاطین نے آپ صلی اللہ علیہ وسلم کے خلاف مکارانہ چال چلی تھی؟“ انہوں نے بیان کیا کہ ”شیاطین مختلف وادیوں اور گھاٹیوں سے رسول اللہ صلی اللہ علیہ وسلم کی طرف امڈ آئے تھے، ان میں ایک ایسا شیطان بھی شامل تھا جس کے ہاتھ میں آگ کا ایک شعلہ تھا اور وہ اس کے ذریعے رسول اللہ صلی اللہ علیہ وسلم کو جلانے کا ارادہ رکھتا تھا، پس جب رسول اللہ صلی اللہ علیہ وسلم نے انہیں دیکھا تو آپ صلی اللہ علیہ وسلم سخت فکرمند ہوئے، تب جبرئیل علیہ السلام آپ صلی اللہ علیہ وسلم کے پاس تشریف لائے اور عرض کیا: اے محمد صلی اللہ علیہ وسلم ! آپ کہیے، آپ صلی اللہ علیہ وسلم نے دریافت فرمایا: ”میں کیا کہوں؟“ انہوں نے کہا کہ آپ یہ پڑھیں: «أَعُوذُ بِكَلِمَاتِ اللَّهِ التَّامَّاتِ الَّتِي لَا يُجَاوِزُهُنَّ بَرٌّ وَلَا فَاجِرٌ مِنْ شَرِّ مَا نَزَلَ مِنَ السَّمَاءِ، وَمِنْ شَرِّ مَا يَعْرُجُ فِيهَا، وَمِنْ شَرِّ مَا فِي الْأَرْضِ، وَمِنْ شَرِّ مَا يَخْرُجُ مِنْهَا، وَمِنْ شَرِّ اللَّيْلِ وَالنَّهَارِ، وَمِنْ شَرِّ كُلِّ طَارِقٍ إِلَّا طَارِقٌ يَطْرُقُ بِخَيْرٍ يَا رَحْمَانُ» ”میں اللہ کے ان کامل کلمات کی پناہ مانگتا ہوں جن سے نہ کوئی نیک آگے بڑھ سکتا ہے اور نہ کوئی بدکار، اس چیز کے شر سے جو آسمان سے نازل ہوتی ہے اور اس کے شر سے جو اس میں چڑھتی ہے، اور اس شر سے جو زمین میں پھیلا ہوا ہے اور اس شر سے جو اس سے نکلتا ہے، اور رات و دن کے فتنوں کے شر سے، اور ہر اچانک آنے والے کے شر سے سوائے اس کے جو خیر و بھلائی لے کر آئے، اے رحمن!“ سیدنا عبد الرحمن رضی اللہ عنہ نے فرمایا کہ ”اس دعا کی برکت سے شیطان کی آگ بجھ گئی اور اللہ عزوجل نے انہیں شکست و ہزیمت سے دوچار کر دیا۔““ [مسند أبي يعلى الموصلي/حديث عبد الرحمن بن حبشي/حدیث: 6844]