زغب بن فلاں الازدی رحمہ اللہ سے روایت ہے کہ سیدنا عبداللہ بن حوالہ الازدی رضی اللہ عنہ ہمارے ہاں تشریف لائے، تو میں نے ان سے عرض کیا کہ مجھے یہ خبر پہنچی ہے کہ آپ کے لیے سالانہ دو سو (بطورِ وظیفہ) مقرر کیے گئے تھے مگر آپ نے انہیں قبول کرنے سے انکار کر دیا؟ انہوں نے جواباً ارشاد فرمایا: ”رسول اللہ صلی اللہ علیہ وسلم نے ہمیں مدینہ منورہ کے اطراف میں مالِ غنیمت کے حصول کے لیے روانہ فرمایا، مگر ہم کچھ بھی حاصل کیے بغیر واپس آگئے، آپ صلی اللہ علیہ وسلم نے جب ہماری تھکن اور کسمپرسی کو محسوس کیا تو یہ دعا فرمائی: «اللَّهُمَّ لَا تَكِلْهُمْ إِلَيَّ فَأَضْعُفَ عَنْهُمْ، وَلَا تَكِلْهُمْ إِلَى أَنْفُسِهِمْ فَيَعْجِزُوا عَنْهَا، وَلَا تَكِلْهُمْ إِلَى النَّاسِ فَيَسْتَأْثِرُوا عَلَيْهِمْ» ”اے اللہ! انہیں میرے سپرد نہ کر کہ میں ان کی کفالت سے عاجز آ جاؤں، اور نہ ہی انہیں ان کے اپنے نفسوں کے حوالے کر کہ وہ بے بس ہو جائیں، اور نہ ہی انہیں دوسرے لوگوں کے رحم و کرم پر چھوڑ کہ وہ ان کے مقابلے میں خود کو ترجیح دینے لگیں (اور ان کا حق مار لیں)۔““ [مسند أبي يعلى الموصلي/حديث عبد الله بن حوالة/حدیث: 6867]