سیدنا مسور بن مخرمہ رضی اللہ عنہ سے روایت ہے کہ سیدنا علی رضی اللہ عنہ نے ابو جہل کی بیٹی کو نکاح کا پیغام دیا، جب یہ خبر سیدہ فاطمہ رضی اللہ عنہا کو پہنچی تو وہ رسول اللہ صلی اللہ علیہ وسلم کی خدمت میں حاضر ہوئیں اور عرض کیا کہ ”لوگ یہ گمان کرتے ہیں کہ آپ اپنی بیٹیوں کی خاطر غصہ نہیں فرماتے، اور ادھر سیدنا علی رضی اللہ عنہ ابو جہل کی بیٹی سے نکاح کرنے والے ہیں“، سیدنا مسور رضی اللہ عنہ بیان کرتے ہیں کہ پھر میں وہاں موجود تھا جب آپ صلی اللہ علیہ وسلم نے خطبہ ارشاد فرمایا، اللہ تعالیٰ کی حمد و ثنا بیان کی اور پھر فرمایا: ”اما بعد! میں نے (اپنی صاحبزادی) کا نکاح ابو العاص سے کیا تو انہوں نے مجھ سے جو بات کہی اسے سچ کر دکھایا، اور یقیناً فاطمہ میرے ہی جگر کا ایک ٹکڑا ہے، اور اللہ کی قسم! اللہ کے رسول کی بیٹی اور اللہ کے دشمن کی بیٹی کبھی کسی ایک مسلمان شخص کے پاس (بطور سوکنیں) جمع نہیں ہو سکتیں“، پس سیدنا علی رضی اللہ عنہ اس پیغامِ نکاح سے رک گئے۔ [مسند أبي يعلى الموصلي/حديث المسور بن مخرمة/حدیث: 7181]