سیدنا ابوموسیٰ اشعری رضی اللہ عنہ سے روایت ہے کہ سیدنا عثمان بن مظعون رضی اللہ عنہ کی اہلیہ نبی کریم صلی اللہ علیہ وسلم کی ازواجِ مطہرات کے پاس آئیں، انہوں نے ان کی حالت پراگندہ دیکھی تو ان سے دریافت کیا: ”تمہیں کیا ہوا ہے؟ حالانکہ قریش میں تمہارے شوہر سے زیادہ غنی تو کوئی شخص نہیں؟“ انہوں نے جواب دیا: ”ہمارا ان سے (ازدواجی) تعلق نہیں رہا، ان کا دن روزے میں اور رات عبادت میں گزرتی ہے۔“ راوی بیان کرتے ہیں کہ پھر نبی کریم صلی اللہ علیہ وسلم تشریف لائے تو ازواجِ مطہرات نے آپ صلی اللہ علیہ وسلم سے اس کا تذکرہ کیا۔ چنانچہ نبی کریم صلی اللہ علیہ وسلم کی ملاقات سیدنا عثمان رضی اللہ عنہ سے ہوئی تو آپ صلی اللہ علیہ وسلم نے دریافت فرمایا: ”اے عثمان! کیا تمہارے لیے میری زندگی میں کوئی نمونہ نہیں ہے؟“ انہوں نے عرض کیا: ”اے اللہ کے رسول! میرے ماں باپ آپ پر قربان ہوں، وہ کیا بات ہے؟“ آپ صلی اللہ علیہ وسلم نے فرمایا: ”تم رات بھر نماز پڑھتے ہو اور دن میں روزہ رکھتے ہو، حالانکہ تمہاری اہلیہ کا بھی تم پر حق ہے اور تمہارے جسم کا بھی تم پر حق ہے، لہٰذا تم نماز بھی پڑھا کرو اور سویا بھی کرو، اور روزہ بھی رکھا کرو اور افطار بھی کیا کرو۔“ راوی کہتے ہیں کہ اس ہدایت کے بعد وہ خاتون ازواجِ مطہرات کے پاس دوبارہ آئیں تو وہ کسی دلہن کی طرح معطر اور آراستہ تھیں، انہوں نے (تعجب سے) پوچھا: ”یہ کیا تبدیلی ہے؟“ انہوں نے جواب دیا: ”ہمیں بھی وہ (راحت و خوشی) میسر آ گئی ہے جو لوگوں کو میسر آتی ہے۔“ [مسند أبي يعلى الموصلي/حديث أبي موسى الأشعري/حدیث: 7242]