سیدنا ابو موسیٰ رضی اللہ عنہ سے روایت ہے کہ میرے ساتھیوں نے مجھے رسول اللہ صلی اللہ علیہ وسلم کی خدمت میں بھیجا تاکہ میں ان کے لیے سواریوں کا سوال کروں، اس وقت وہ تنگی والے لشکر یعنی غزوہ تبوک میں شامل تھے، میں نے عرض کیا: ”اے اللہ کے نبی! میرے ساتھیوں نے مجھے آپ کی خدمت میں بھیجا ہے تاکہ آپ انہیں سواریاں عطا فرمائیں۔“ آپ صلی اللہ علیہ وسلم نے ارشاد فرمایا: ”اللہ کی قسم! میں انہیں سواری کے لیے کچھ نہیں دے سکتا۔“ اس وقت آپ صلی اللہ علیہ وسلم جلال کی کیفیت میں تھے مگر مجھے اس کا احساس نہ ہو سکا، چنانچہ میں رسول اللہ صلی اللہ علیہ وسلم کے انکار کی وجہ سے اور اس خوف سے کہ کہیں رسول اللہ صلی اللہ علیہ وسلم کے دلِ مبارک میں میری طرف سے کوئی رنجش نہ پیدا ہو گئی ہو، انتہائی غمگین ہو کر واپس لوٹا۔ میں نے اپنے ساتھیوں کے پاس جا کر انہیں رسول اللہ صلی اللہ علیہ وسلم کا فرمان سنا دیا، ابھی تھوڑی ہی دیر گزری تھی کہ میں نے سیدنا بلال رضی اللہ عنہ کو آواز دیتے ہوئے سنا: ”عبداللہ بن قیس کہاں ہیں؟“ میں نے انہیں جواب دیا تو انہوں نے کہا: ”رسول اللہ صلی اللہ علیہ وسلم کی پکار پر لبیک کہو، وہ تمہیں بلا رہے ہیں۔“ جب میں رسول اللہ صلی اللہ علیہ وسلم کی خدمتِ اقدس میں حاضر ہوا تو آپ صلی اللہ علیہ وسلم نے فرمایا: ”یہ دو دو کے جوڑے (یعنی چھ اونٹ جو آپ صلی اللہ علیہ وسلم نے اس وقت سیدنا سعد رضی اللہ عنہ سے خریدے تھے) لے جاؤ اور اپنے ساتھیوں سے جا کر کہو کہ اللہ عزوجل یا رسول اللہ صلی اللہ علیہ وسلم تمہیں ان پر سوار فرما رہے ہیں، لہٰذا تم ان پر سواری کرو۔“ سیدنا ابو موسیٰ رضی اللہ عنہ بیان کرتے ہیں کہ میں وہ اونٹ لے کر اپنے ساتھیوں کے پاس پہنچا اور کہا کہ رسول اللہ صلی اللہ علیہ وسلم تمہیں ان پر سوار فرما رہے ہیں، لیکن اللہ کی قسم! میں تمہیں اس وقت تک نہیں چھوڑوں گا جب تک تم میں سے کچھ لوگ میرے ساتھ چل کر ان حضرات سے تصدیق نہ کر لیں جنہوں نے رسول اللہ صلی اللہ علیہ وسلم کا وہ کلام سنا تھا جب میں نے تمھارے لیے سوال کیا تھا اور آپ صلی اللہ علیہ وسلم نے پہلی مرتبہ انکار فرمایا تھا اور پھر بعد میں یہ اونٹ مجھے عطا فرمائے، تاکہ تم یہ گمان نہ کرو کہ میں نے تمہیں کوئی ایسی بات بتائی ہے جو آپ صلی اللہ علیہ وسلم نے نہیں فرمائی تھی۔ انہوں نے کہا: ”اللہ کی قسم! آپ ہمارے نزدیک سچے اور مستند ہیں اور ہم وہی کریں گے جو آپ نے پسند کیا ہے۔“ چنانچہ سیدنا ابو موسیٰ رضی اللہ عنہ ان میں سے ایک جماعت کو ساتھ لے کر ان لوگوں کے پاس آئے جنہوں نے رسول اللہ صلی اللہ علیہ وسلم کا قول اور آپ صلی اللہ علیہ وسلم کا پہلے انکار کرنا اور پھر بعد میں عطا فرمانا سنا تھا، تو ان حضرات نے ان کے سامنے بالکل ویسی ہی بات بیان کی جیسی سیدنا ابو موسیٰ رضی اللہ عنہ نے انہیں بتائی تھی۔ [مسند أبي يعلى الموصلي/حديث أبي موسى الأشعري/حدیث: 7297]