سیدنا عمرو بن العاص رضی اللہ عنہ سے روایت ہے کہ ”میں نے قریش کو کبھی بھی رسول اللہ صلی اللہ علیہ وسلم کے قتل کا پختہ ارادہ کرتے ہوئے نہیں دیکھا سوائے اس دن کے جب انہوں نے آپ صلی اللہ علیہ وسلم کے خلاف باہمی مشورہ کیا، وہ کعبہ کے سائے میں بیٹھے ہوئے تھے اور رسول اللہ صلی اللہ علیہ وسلم مقامِ ابراہیم کے پاس نماز ادا فرما رہے تھے، تب عقبہ بن ابی معیط آپ صلی اللہ علیہ وسلم کی طرف بڑھا اور اپنی چادر آپ صلی اللہ علیہ وسلم کی گردن مبارک میں ڈال کر اسے اس زور سے کھینچا کہ آپ صلی اللہ علیہ وسلم اپنے گھٹنوں کے بل گر پڑے، لوگ چیخنے لگے اور انہوں نے یہ گمان کر لیا کہ آپ صلی اللہ علیہ وسلم کو شہید کر دیا جائے گا، راوی بیان کرتے ہیں کہ اتنے میں سیدنا ابوبکر رضی اللہ عنہ تیزی سے دوڑتے ہوئے آئے اور رسول اللہ صلی اللہ علیہ وسلم کو پیچھے سے کندھوں سے تھام لیا اور فرمانے لگے: ﴿أَتَقْتُلُونَ رَجُلًا أَنْ يَقُولَ رَبِّيَ اللَّهُ﴾ ”کیا تم ایک ایسے شخص کو قتل کرتے ہو جو یہ کہتا ہے کہ میرا رب اللہ ہے؟“ پھر وہ لوگ نبی کریم صلی اللہ علیہ وسلم سے پیچھے ہٹ گئے، پس رسول اللہ صلی اللہ علیہ وسلم کھڑے ہوئے اور جب اپنی نماز مکمل کر لی تو ان کے پاس سے گزرے جبکہ وہ کعبہ کے سائے میں بیٹھے ہوئے تھے، آپ صلی اللہ علیہ وسلم نے ان سے مخاطب ہو کر فرمایا: «يَا مَعْشَرَ قُرَيْشٍ، أَمَا وَالَّذِي نَفْسِي بِيَدِهِ مَا أُرْسِلْتُ إِلَيْكُمْ إِلَّا بِالذَّبْحِ» ”اے گروہِ قریش! آگاہ ہو جاؤ، اس ذات کی قسم جس کے قبضے میں میری جان ہے! میں تمہاری طرف ذبح ہی لے کر بھیجا گیا ہوں“ اور آپ صلی اللہ علیہ وسلم نے اپنے دستِ مبارک سے اپنے حلق کی طرف اشارہ کیا، اس پر ابوجہل نے آپ صلی اللہ علیہ وسلم سے کہا: اے محمد! آپ نادان اور بے عقل تو نہ تھے؟ تو رسول اللہ صلی اللہ علیہ وسلم نے فرمایا: ”تم بھی انہی میں سے ہو“۔“ [مسند أبي يعلى الموصلي/مسند عمرو بن العاص رضي الله عنه/حدیث: 7339]