سیدنا جبیر بن مطعم رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو مسجدِ خیف میں لوگوں سے خطاب فرماتے ہوئے سنا، آپ صلی اللہ علیہ وسلم نے ارشاد فرمایا: ”اللہ اس بندے کو شاد و آباد اور ترو تازہ رکھے جس نے میری بات سنی، اسے ذہن نشین کیا اور پھر اسے ان لوگوں تک پہنچا دیا جنہوں نے اسے نہیں سنا تھا، کیونکہ بسا اوقات علم و فقہ کی بات اٹھانے والا خود صاحبِ فہم و بصیرت نہیں ہوتا اور بسا اوقات وہ علم کی بات ایسے شخص تک پہنچا دیتا ہے جو اس سے زیادہ سمجھ بوجھ رکھنے والا ہوتا ہے۔ تین باتیں ایسی ہیں جن پر ایک مومن کا دل کبھی خیانت یا کینہ نہیں رکھتا: اللہ کے لیے عمل میں اخلاص پیدا کرنا، حکمرانوں کی خیر خواہی و اطاعت کرنا اور مسلمانوں کی جماعت کے ساتھ لازم رہنا، کیونکہ ان کی دعا (برکت و حفاظت کے طور پر) ان کے پیچھے سے انہیں اپنے حصار میں لیے رکھتی ہے۔“ [مسند أبي يعلى الموصلي/حديث جبير بن مطعم، عن النبي صلى الله عليه وسلم/حدیث: 7413]