سیدنا جابر بن سمرہ رضی اللہ عنہ سے روایت ہے کہ رسول اللہ صلی اللہ علیہ وسلم مسجد میں تشریف لائے اور ارشاد فرمایا: ”کیا تم اس طرح صفیں نہیں بناتے جس طرح فرشتے اپنے رب کے حضور صفیں بناتے ہیں؟“ صحابہ کرام رضی اللہ عنہم نے عرض کی: اے اللہ کے رسول! فرشتے اپنے رب کے پاس کس طرح صف بندی کرتے ہیں؟ آپ صلی اللہ علیہ وسلم نے فرمایا: ”وہ پہلے اگلی صفوں کو مکمل کرتے ہیں اور صف میں ایک دوسرے سے جڑ کر کھڑے ہوتے ہیں۔“ راوی بیان کرتے ہیں کہ ایک مرتبہ آپ صلی اللہ علیہ وسلم مسجد میں تشریف لائے تو لوگ الگ الگ حلقوں میں بیٹھے ہوئے تھے، آپ صلی اللہ علیہ وسلم نے (انہیں دیکھ کر) فرمایا: ”کیا معاملہ ہے کہ میں تمہیں الگ الگ ٹکڑیوں میں بکھرا ہوا دیکھ رہا ہوں؟“ [مسند أبي يعلى الموصلي/حديث جابر بن سمرة السوائي، عن النبي صلى الله عليه وسلم/حدیث: 7474]