سیدنا سعد بن ابی وقاص رضی اللہ عنہ سے روایت ہے، وہ فرماتے ہیں کہ حجۃ الوداع کے سال میں ایک سخت بیماری میں مبتلا تھا تو رسول اللہ صلی اللہ علیہ وسلم میری عیادت کے لیے تشریف لائے۔ میں نے عرض کیا: ”اے اللہ کے رسول! میری بیماری کی شدت آپ دیکھ ہی رہے ہیں، میں مالدار آدمی ہوں اور میری وارث صرف ایک بیٹی ہے، کیا میں اپنا دو تہائی مال صدقہ کر دوں؟“ آپ صلی اللہ علیہ وسلم نے فرمایا: ”نہیں۔“ میں نے عرض کیا: ”تو آدھا؟“ آپ صلی اللہ علیہ وسلم نے فرمایا: ”نہیں۔“ پھر فرمایا: ”ایک تہائی، اور ایک تہائی بھی بہت ہے۔ اگر تم اپنے وارثوں کو مالدار چھوڑ کر جاؤ تو یہ اس سے بہتر ہے کہ انہیں محتاج چھوڑو کہ وہ لوگوں کے آگے ہاتھ پھیلاتے پھریں۔ اور تم اللہ کی رضا کے لیے جو بھی خرچ کرو گے اس پر تمہیں اجر ملے گا، یہاں تک کہ اس لقمے پر بھی جو تم اپنی بیوی کے منہ میں ڈالتے ہو۔“ میں نے عرض کیا: ”اے اللہ کے رسول! کیا میں اپنے ساتھیوں کے (مدینہ لوٹ جانے کے) بعد (مکہ میں) پیچھے رہ جاؤں گا؟“ آپ صلی اللہ علیہ وسلم نے فرمایا: ”تم پیچھے رہ کر جو بھی نیک عمل اللہ کی رضا کے لیے کرو گے اس سے تمہارا درجہ اور مرتبہ بڑھے گا، اور شاید تم زندہ رہو یہاں تک کہ تم سے کچھ قوموں کو نفع پہنچے اور کچھ دوسروں کو نقصان۔“ (پھر دعا فرمائی:) «اللَّهُمَّ أَمْضِ لِأَصْحَابِي هِجْرَتَهُمْ وَلَا تَرُدَّهُمْ عَلَى أَعْقَابِهِمْ» ”اے اللہ! میرے ساتھیوں کی ہجرت کو پورا فرما اور انہیں ان کی ایڑیوں کے بل (پیچھے) نہ لوٹا۔“ (پھر فرمایا:) ”لیکن قابلِ افسوس تو سعد بن خولہ ہیں۔“ رسول اللہ صلی اللہ علیہ وسلم ان پر اس لیے افسوس کا اظہار فرما رہے تھے کہ ان کی وفات مکہ میں ہوئی تھی۔ [مسند أبي يعلى الموصلي/مسند سعد بن أبي وقاص/حدیث: 834]