سیدنا ابو جحیفہ رضی اللہ عنہ سے روایت ہے کہ رسول اللہ صلی اللہ علیہ وسلم نے سیدنا سلمان اور سیدنا ابو الدرداء رضی اللہ عنہما کے درمیان بھائی چارہ قائم کیا۔ سیدنا سلمان رضی اللہ عنہ سیدنا ابو الدرداء رضی اللہ عنہ سے ملنے آئے تو سیدہ ام الدرداء رضی اللہ عنہا کو پراگندہ حال (بناؤ سنگھار ترک کیے ہوئے) دیکھا اور پوچھا: ”تمہارا کیا حال ہے؟“ انہوں نے کہا: ”تمہارے بھائی کو دنیا کی کوئی حاجت نہیں۔“ جب سیدنا ابو الدرداء رضی اللہ عنہ آئے تو سیدنا سلمان رضی اللہ عنہ نے انہیں خوش آمدید کہا اور ان کے سامنے کھانا رکھا، اور ان سے کہا: ”کھاؤ۔“ انہوں نے کہا: ”میں روزے سے ہوں۔“ سیدنا سلمان رضی اللہ عنہ نے کہا: ”میں تمہیں قسم دیتا ہوں کہ ضرور کھاؤ، میں تمہارے کھائے بغیر نہیں کھاؤں گا۔“ چنانچہ انہوں نے ان کے ساتھ کھایا اور سیدنا سلمان رضی اللہ عنہ ان کے ہاں رات ٹھہرے۔ جب رات ہوئی تو سیدنا ابو الدرداء رضی اللہ عنہ (نماز کے لیے) اٹھے تو سیدنا سلمان رضی اللہ عنہ نے انہیں بٹھا دیا اور کہا: ”اے ابو الدرداء! تمہارے رب کا تم پر حق ہے، تمہارے گھر والوں کا تم پر حق ہے اور تمہارے جسم کا تم پر حق ہے، ہر حق دار کو اس کا حق دو؛ روزہ بھی رکھو اور افطار بھی کرو، قیام بھی کرو اور سویا بھی کرو، اور اپنی بیوی کے پاس بھی جاؤ۔“ جب صبح کا وقت قریب ہوا تو کہا: ”اب اٹھو۔“ چنانچہ دونوں اٹھے اور نماز پڑھی، پھر (فرض) نماز کے لیے نکلے۔ جب نبی کریم صلی اللہ علیہ وسلم نے نماز پڑھا لی تو سیدنا ابو الدرداء رضی اللہ عنہ آپ صلی اللہ علیہ وسلم کے پاس گئے اور سیدنا سلمان رضی اللہ عنہ کی بات بتائی، تو رسول اللہ صلی اللہ علیہ وسلم نے بھی انہیں وہی بات فرمائی جو سیدنا سلمان رضی اللہ عنہ نے کہی تھی۔ [مسند أبي يعلى الموصلي/من مسند أبي جحيفة/حدیث: 898]