محمد بن خالد رحمہ اللہ اپنے والد سے اور وہ اپنے دادا رضی اللہ عنہ سے روایت کرتے ہیں، جنہیں صحبت کا شرف حاصل تھا، کہ وہ اپنے کسی بھائی کی ملاقات کے لیے نکلے، ابھی ان تک پہنچے نہیں تھے کہ انہیں اطلاع ملی کہ وہ بیمار ہیں۔ جب ان کے پاس پہنچے تو کہا: ”میں تمہاری ملاقات کو آیا ہوں، یا عیادت کو آیا ہوں، یا خوش خبری دینے آیا ہوں۔“ انہوں نے پوچھا: ”تم نے یہ سب کیسے جمع کر لیا؟“ کہا: ”میں تم سے ملاقات کے ارادے سے نکلا تھا، ابھی تم تک نہیں پہنچا تھا کہ تمہاری بیماری کی خبر ملی تو یہ عیادت ہو گئی، اور میں تمہیں ایک ایسی بات کی خوش خبری دیتا ہوں جو میں نے رسول اللہ صلی اللہ علیہ وسلم سے سنی ہے، آپ صلی اللہ علیہ وسلم نے فرمایا: ’جب اللہ کی طرف سے بندے کے لیے کوئی ایسا مرتبہ مقدر ہو چکا ہو جس تک وہ اپنے عمل سے نہیں پہنچ سکتا تو اللہ اسے اس کے جسم، یا اس کے مال، یا اس کی اولاد میں آزمائش میں ڈال دیتا ہے، پھر اسے صبر کی توفیق دیتا ہے یہاں تک کہ وہ اس مرتبے کو پا لیتا ہے جو اللہ عزوجل کی طرف سے اس کے لیے مقدر ہو چکا تھا۔‘“ [مسند أبي يعلى الموصلي/جد خالد عن النبي صلى الله عليه وسلم/حدیث: 923]