ابن شفیع رحمہ اللہ، جو طبیب تھے، بیان کرتے ہیں کہ سیدنا اسید بن حضیر رضی اللہ عنہ نے مجھے بلایا تو میں نے ان کی عرق النسا کی رگ کاٹی (یعنی علاج کیا)، اس موقع پر انہوں نے مجھے دو حدیثیں سنائیں۔ انہوں نے فرمایا: ”میری قوم کے دو گھرانے، ایک بنو ظفر کا اور ایک بنو معاویہ کا، میرے پاس آئے اور کہا: ’رسول اللہ صلی اللہ علیہ وسلم سے بات کیجیے کہ آپ صلی اللہ علیہ وسلم ہمیں بھی (مال میں سے) حصہ عطا فرمائیں۔‘ میں نے آپ صلی اللہ علیہ وسلم سے بات کی تو آپ صلی اللہ علیہ وسلم نے فرمایا: ’ہاں، میں ان میں سے ہر گھرانے کو ایک حصہ دوں گا، پھر اگر اللہ نے ہمیں مزید عطا فرمایا تو ہم پھر انہیں دیں گے۔‘ میں نے عرض کیا: ’اے اللہ کے رسول! اللہ آپ کو جزائے خیر دے۔‘ آپ صلی اللہ علیہ وسلم نے فرمایا: ’اور تمہیں بھی اللہ جزائے خیر دے، کیونکہ جہاں تک میں جانتا ہوں تم لوگ پاک دامن اور صابر ہو۔‘“ اور انہوں نے فرمایا: ”میں نے رسول اللہ صلی اللہ علیہ وسلم کو یہ بھی فرماتے سنا: ’میرے بعد تم (اپنے اوپر دوسروں کی) ترجیح دیکھو گے۔‘ پھر جب سیدنا عمر بن خطاب رضی اللہ عنہ کا دور آیا تو انہوں نے لوگوں میں جوڑے تقسیم کیے اور مجھے بھی ایک جوڑا بھیجا، میں نے اسے کم تر سمجھا اور اپنی بیٹی کو دے دیا۔ پھر ایک دن میں نماز پڑھ رہا تھا کہ قریش کا ایک نوجوان میرے پاس سے گزرا جو انہی جوڑوں میں سے ایک جوڑا پہنے اسے گھسیٹتا جا رہا تھا، تو مجھے رسول اللہ صلی اللہ علیہ وسلم کا فرمان یاد آ گیا: ’میرے بعد تم ترجیح دیکھو گے۔‘ چنانچہ میں نے کہا: ’اللہ اور اس کے رسول نے سچ فرمایا۔‘ ایک شخص سیدنا عمر رضی اللہ عنہ کے پاس گیا اور انہیں یہ بات بتا دی، وہ آئے تو میں نماز پڑھ رہا تھا، انہوں نے فرمایا: ’اسید! نماز پڑھ لو۔‘ جب میں نماز سے فارغ ہوا تو فرمایا: ’تم نے کیا کہا تھا؟‘ میں نے انہیں بتایا تو انہوں نے فرمایا: ’وہ جوڑا تو میں نے فلاں شخص کو بھیجا تھا جو بدری، احدی اور عقبی (یعنی بیعتِ عقبہ میں شریک) ہے، پھر اس نوجوان نے اس سے خرید کر پہن لیا۔ تو کیا تم نے یہ گمان کیا کہ وہ (ترجیح) میرے زمانے میں ہوگی؟‘ میں نے عرض کیا: ’اللہ کی قسم! اے امیر المومنین، میرا بھی یہی گمان تھا کہ یہ آپ کے زمانے میں نہیں ہوگی۔‘“ [مسند أبي يعلى الموصلي/أسيد بن حضير، عن النبي صلى الله عليه وسلم/حدیث: 945]