سیدنا ابو سعید خدری رضی اللہ عنہ سے روایت ہے کہ مسلمانوں میں سے ایک آدمی نے عرض کیا: ”اے اللہ کے رسول! یہ بیماریاں جو ہمیں لاحق ہوتی ہیں، ان میں ہمارے لیے کیا (اجر) ہے؟“ آپ صلی اللہ علیہ وسلم نے فرمایا: ”یہ (گناہوں کا) کفارہ ہیں۔“ اس نے عرض کیا: ”اے اللہ کے رسول! اگرچہ تھوڑی ہوں؟“ آپ صلی اللہ علیہ وسلم نے فرمایا: ”اگرچہ ایک کانٹا ہو یا اس سے بڑھ کر۔“ راوی کہتے ہیں: چنانچہ اس شخص نے اپنے لیے دعا کی کہ بخار اس سے جدا نہ ہو یہاں تک کہ وہ فوت ہو جائے، اور یہ کہ وہ اسے حج، عمرہ، اللہ کی راہ میں جہاد اور باجماعت فرض نماز سے غافل نہ کرے۔ چنانچہ جو انسان بھی اس کے جسم کو چھوتا وہ اس کی حرارت محسوس کرتا، یہاں تک کہ وہ فوت ہو گیا۔ [مسند أبي يعلى الموصلي/من مسند أبي سعيد الخدري/حدیث: 995]