حضرت عمرہ بنت عبدالرحمن رحمہا اللہ سے روایت ہے کہ حضرت بریرہ رضی اللہ عنہا ام المومنین حضرت عائشہ رضی اللہ عنہا سے مدد لینے کے لیے حاضر ہوئیں تو انہوں نے فرمایا: اگر تیرے مالک یہ پسند کریں کہ میں تیرا بدلِ کتابت انہیں یکمشت ادا کر دوں اور تجھے آزاد کر دوں تو میں ایسا کر سکتی ہوں۔ حضرت بریرہ رضی اللہ عنہا نے اس کا ذکر اپنے آقاؤں سے کیا تو انہوں نے کہا کہ ہم ولا سے کسی صورت بھی دستبردار نہیں ہوں گے۔ امام مالک رحمہ اللہ نے یحییٰ سے بیان کیا کہ حضرت عمرہ رحمہا اللہ نے کہا: حضرت عائشہ رضی اللہ عنہا نے اس کا ذکر رسول اللہ صلی اللہ علیہ وسلم سے کیا تو آپ نے فرمایا: ”تو اسے خرید کر آزاد کر دے، ولا تو اسی کی ہو گی جس نے آزاد کیا ہے“۔ [صحيح البخاري/كِتَاب الْمُكَاتِبِ/حدیث: 2564]