حضرت سعید بن مسیب کے والد حضرت مسیب بن حزن رضی اللہ عنہ سے روایت ہے، انہوں نے کہا: ”جب ابوطالب کی وفات کا وقت آیا تو رسول اللہ صلی اللہ علیہ وسلم ان کے پاس تشریف لے گئے، آپ صلی اللہ علیہ وسلم نے دیکھا کہ وہاں ابوجہل اور عبداللہ بن ابی امیہ بن مغیرہ پہلے ہی سے بیٹھے ہوئے ہیں۔ آپ صلی اللہ علیہ وسلم نے ابوطالب سے فرمایا: ”اے چچا جان! آپ «لَا إِلٰهَ إِلَّا اللّٰهُ» "لا الہ الا اللہ" پڑھ لیں تو میں قیامت کے دن اللہ تعالیٰ کے ہاں اسے بطور دلیل پیش کر سکوں گا۔“ ابوجہل اور عبداللہ بن ابی امیہ کہنے لگے: ”اے ابوطالب! کیا آپ عبدالمطلب کا دین چھوڑ دیں گے؟“ رسول اللہ صلی اللہ علیہ وسلم ان سے بار بار یہی کہتے رہے اور وہ دونوں بھی بار بار اپنی بات دہراتے رہے۔ آخر ابوطالب کی زبان سے جو آخری کلمہ نکلا وہ یہی تھا کہ وہ عبدالمطلب کے مذہب ہی پر قائم ہیں اور انہوں نے «لَا إِلٰهَ إِلَّا اللّٰهُ» "لا الہ الا اللہ" پڑھنے سے انکار کر دیا۔ راوی نے کہا کہ رسول اللہ صلی اللہ علیہ وسلم نے فرمایا: ”اللہ کی قسم! میں آپ کے لیے ضرور مغفرت طلب کرتا رہوں گا جب تک کہ مجھے اس سے روک نہ دیا جائے۔“ پھر اللہ تعالیٰ نے یہ آیت نازل فرمائی: ﴿مَا كَانَ لِلنَّبِيِّ وَالَّذِينَ آمَنُوا أَن يَسْتَغْفِرُوا لِلْمُشْرِكِينَ﴾ [سورة التوبة: 113] ”نبی اور اہل ایمان کے لیے یہ مناسب نہیں کہ وہ مشرکین کے لیے دعائے مغفرت کریں۔“ اور اللہ تعالیٰ نے ابوطالب کے متعلق یہ آیت نازل کی اور رسول اللہ صلی اللہ علیہ وسلم سے فرمایا: ﴿إِنَّكَ لَا تَهْدِي مَنْ أَحْبَبْتَ وَلَٰكِنَّ اللَّهَ يَهْدِي مَن يَشَاءُ﴾ [سورة القصص: 56] ”بیشک آپ جسے چاہیں ہدایت نہیں دے سکتے بلکہ اللہ تعالیٰ ہی جسے چاہتا ہے ہدایت دیتا ہے۔“ حضرت ابن عباس رضی اللہ عنہما نے فرمایا: «أُولِي الْقُوَّةِ» [سورة القصص: 76] کا مطلب ہے کہ قارون کے خزانوں کی چابیوں کو طاقت ور مردوں کی ایک جماعت بھی نہیں اٹھا پاتی تھی۔ «لَتَنُوءُ» [سورة القصص: 76] کے معنی ہیں: ”بوجھل کر دیتی تھی، بوجھ سے جھکا دیتی تھی۔“ «فَارِغًا» [سورة القصص: 10] کے معنی ہیں: ”حضرت موسیٰ علیہ السلام کی ماں کے دل میں موسیٰ علیہ السلام کے علاوہ اور کوئی خیال نہیں رہا تھا۔“ «الْفَرِحِينَ» [سورة القصص: 76] سے مراد ”اترانے والے، مارے خوشی کے پھول جانے والے“ ہیں۔ «قُصِّيهِ» [سورة القصص: 11] کے معنی ہیں: ”اس کے پیچھے پیچھے چلی جا۔“ اور کبھی یہ لفظ قصہ اور کلام بیان کرنے کے معنی میں بھی استعمال ہوتا ہے جیسا کہ ﴿نَحْنُ نَقُصُّ عَلَيْكَ﴾ [سورة يوسف: 3] میں ہے، یعنی ”ہم آپ کو بیان سناتے ہیں۔“ «عَنْ جُنُبٍ» [سورة القصص: 11] کے معنی بُعد کے ہیں، یعنی ”دور سے“ اور «عَنْ جَنَابَةٍ» کے بھی یہی معنی ہیں کہ وہ پاکی سے دور ہو گیا، اسی طرح «عَنِ اجْتِنَابٍ» کے معنی ہیں کہ ”وہ پرہیز کر گیا۔“ «نَبْطِشُ» (از باب ضرب) اور «نَبْطُشُ» (از باب نصر) دونوں کے معنی ”گرفت کرنا“ ہیں۔ «يَأْتَمِرُونَ» [سورة القصص: 20] کے معنی ہیں: ”باہم مشورہ کر رہے ہیں۔“ «الْعُدْوَانُ»، «الْعَدَاءُ» اور «التَّعَدِّي» کے ایک ہی معنی ہیں، یعنی ”زیادتی کرنا اور حد سے تجاوز کرنا۔“ «آنَسَ» [سورة القصص: 29] کے معنی ہیں: ”اس نے دیکھا۔“ «الْجَذْوَةُ» [سورة القصص: 29] لکڑی کا وہ موٹا ٹکڑا جس کے سرے پر آگ لگی ہو لیکن اس میں شعلہ نہ ہو اور «شِهَابٍ» شعلے دار کو کہتے ہیں۔ «الْحَيَّاتُ» یعنی سانپوں کی مختلف اقسام، «الْجَانُّ» [سورة القصص: 31] چھوٹا اور سفید سانپ، «الْأَفَاعِي» بڑا سانپ اور «الْأَسَاوِدُ» سیاہ ناگ کو کہتے ہیں۔ «رِدْءًا» [سورة القصص: 34] کے معنی ہیں: ”مددگار اور پشت پناہ۔“ حضرت ابن عباس رضی اللہ عنہما نے «يُصَدِّقُنِي» [سورة القصص: 34] کے معنی کیے ہیں: ”وہ میری تصدیق کرے“ یعنی میری بات کو کھول کر بیان کر دے۔ ان کے علاوہ دیگر اہل علم نے کہا ہے کہ «سَنَشُدُّ» [سورة القصص: 35] کے معنی ہیں: ”ہم تیری مدد کریں گے۔“ جب تم کسی کی مدد کرتے ہو تو گویا اس کا بازو بن جاتے ہو۔ «الْمَقْبُوحِينَ» [سورة القصص: 42] کے معنی ہیں: ”ہلاک شدہ۔“ «وَصَّلْنَا» [سورة القصص: 51] کے معنی ہیں: ”ہم نے اس کو بیان کیا اور پورا کیا۔“ «يُجْبَىٰ» [سورة القصص: 57] کے معنی ہیں: ”کھچے چلے آتے ہیں۔“ «بَطِرَتْ» [سورة القصص: 58] کے معنی ہیں: ”تکبر کیا اور شرارت کی۔“ ﴿فِي أُمِّهَا رَسُولًا﴾ [سورة القصص: 59] سے مراد ”ام القریٰ“ یعنی مکہ اور اس کے اطراف ہیں۔ «تُكِنُّ» [سورة القصص: 69] کے معنی ہیں «تُخْفِي»، یعنی ”پوشیدہ رکھتے ہیں۔“ اہل عرب کہتے ہیں: «أَكْنَنْتُ الشَّيْءَ» ”میں نے اس کو چھپا لیا“ اور «كَنَنْتُهُ» کے بھی یہی معنی ہیں۔ اس کے معنی ظاہر کرنا بھی ہیں، یعنی یہ لفظ اضداد سے ہے۔ «وَيْكَأَنَّ اللَّهَ» [سورة القصص: 82] کے معنی «أَلَمْ تَرَ أَنَّ اللَّهَ» کے ہیں۔ ﴿يَبْسُطُ الرِّزْقَ لِمَن يَشَآءُ وَيَقْدِرُ﴾ [سورة القصص: 82] کے معنی ہیں: ”جس کو چاہتا ہے فراخ روزی دیتا ہے اور جسے چاہتا تنگ روزی دیتا ہے۔“ [صحيح البخاري/كِتَاب تَفْسِيرِ الْقُرْآنِ/حدیث: 4772]