سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب تم میں سے کوئی دعا کرے تو یہ نہ کہے کہ (یا اللہ) اگر تو چاہتا ہے (تو قبول کر لے) بلکہ چاہیے کہ پورے عزم کے ساتھ دعا کرے اور اپنی طلب کو بڑھائے کیونکہ اللہ کے لیے کسی چیز کا عطا کرنا بڑی بات نہیں ہے۔“ [صحيح الادب المفرد/حدیث: 475]

سیدنا انس رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”جب تم میں سے کوئی دعا کرے تو پورے عزم کے ساتھ دعا کرے اور یہ نہ کہے (اور ایک روایت میں ہے: جب تم اللہ سے دعا کرو تو پورے عزم کے ساتھ دعا کرو اور تم میں سے کوئی یوں نہ کہے) کہ یا اللہ! اگر تو چاہتا ہے تو مجھے دے دے کیونکہ اللہ کو کوئی مجبور کرنے والا نہیں ہے۔“ [صحيح الادب المفرد/حدیث: 476]