بریدہ رضی اللہ عنہ بیان کرتے ہیں کہ کسی آدمی نے نمازوں کے اوقات کے بارے میں رسول اللہ صلی ‌اللہ ‌علیہ ‌وآلہ ‌وسلم سے دریافت کیا تو آپ صلی ‌اللہ ‌علیہ ‌وآلہ ‌وسلم نے اسے فرمایا: ”تم دو دن ہمارے ساتھ نماز پڑھو۔“ جب سورج ڈھل گیا تو آپ صلی ‌اللہ ‌علیہ ‌وآلہ ‌وسلم نے بلال رضی اللہ عنہ کو حکم فرمایا تو انہوں نے اذان دی، پھر آپ صلی ‌اللہ ‌علیہ ‌وآلہ ‌وسلم نے حکم دیا تو انہوں نے اقامت کہی، پھر آپ صلی ‌اللہ ‌علیہ ‌وآلہ ‌وسلم نے انہیں حکم دیا تو انہوں نے عصر کے لیے اقامت کہی جبکہ سورج بلند، صاف اور چمک دار تھا، پھر آپ صلی ‌اللہ ‌علیہ ‌وآلہ ‌وسلم نے انہیں حکم دیا تو انہوں نے سورج غروب ہو جانے پر مغرب کے لیے اقامت کہی، اور پھر جب شفق غائب ہو گئی تو آپ صلی ‌اللہ ‌علیہ ‌وآلہ ‌وسلم نے انہیں نمازِ عشاء کے لیے اقامت کہنے کا حکم فرمایا، پھر جب فجر طلوع ہو گئی تو آپ صلی ‌اللہ ‌علیہ ‌وآلہ ‌وسلم نے انہیں نمازِ فجر کے لیے اقامت کہنے کا حکم فرمایا، دوسرے روز آپ صلی ‌اللہ ‌علیہ ‌وآلہ ‌وسلم نے انہیں ظہر کو ٹھنڈا کرنے کا حکم فرمایا تو انہوں نے اسے خوب مؤخر کیا، آپ صلی ‌اللہ ‌علیہ ‌وآلہ ‌وسلم نے عصر پڑھی جبکہ سورج بلند تھا، آپ صلی ‌اللہ ‌علیہ ‌وآلہ ‌وسلم نے گزشتہ روز سے اسے مؤخر کیا، آپ صلی ‌اللہ ‌علیہ ‌وآلہ ‌وسلم نے شفق غائب ہو جانے سے پہلے مغرب پڑھی اور تہائی رات گزر جانے کے بعد عشاء پڑھی، اور فجر، طلوعِ فجر کے روشن ہو جانے پر پڑھی، پھر فرمایا: ”نمازوں کے اوقات معلوم کرنے والا شخص کہاں ہے؟“ تو اس آدمی نے عرض کیا: اے اللہ کے رسول! میں حاضر ہوں، آپ صلی ‌اللہ ‌علیہ ‌وآلہ ‌وسلم نے فرمایا: ”تمہاری نمازوں کا وقت ان اوقات کے مابین ہے جس کا تم ملاحظہ کر چکے ہو۔“ رواہ مسلم۔ [مشكوة المصابيح/كتاب الصلاة/حدیث: 582]