ابن عباس رضی اللہ عنہما بیان کرتے ہیں، جب یہ آیت: ﴿جو لوگ سونا چاندی ذخیرہ کرتے ہیں،،،،،،﴾ [سورة التوبة: 34] نازل ہوئی تو یہ مسلمانوں پر بہت گراں گزری، تو عمر رضی اللہ عنہ نے فرمایا: میں تمہاری اس مشکل کو حل کرتا ہوں، وہ گئے اور عرض کیا، اللہ کے نبی! یہ آیت آپ کے صحابہ پر بہت گراں گزری ہے، آپ صلی ‌اللہ ‌علیہ ‌وآلہ ‌وسلم نے فرمایا: ”اللہ نے زکوۃ اس لیے فرض کی ہے تاکہ وہ تمہارے باقی اموال کو پاک کر دے، اور اس نے وراثت کو اس لیے فرض کیا۔“ راوی کہتے ہیں: آپ صلی ‌اللہ ‌علیہ ‌وآلہ ‌وسلم نے ایک کلمہ ذکر کیا: ”تاکہ وہ تمہارے بعد والوں کے لیے ہو جائے۔“ راوی بیان کرتے ہیں، عمر رضی اللہ عنہ نے (خوشی کے ساتھ) نعرہ تکبیر بلند کیا، پھر آپ صلی ‌اللہ ‌علیہ ‌وآلہ ‌وسلم نے انہیں فرمایا: ”کیا میں تمہیں آدمی کے بہترین خزانے کے متعلق نہ بتاؤں؟ وہ صالحہ بیوی ہے، جب وہ اس کی طرف دیکھے تو وہ اسے خوش کر دے، جب وہ اسے حکم دے تو وہ اس کی اطاعت کرے اور جب وہ اس کے پاس نہ ہو تو وہ اس (کے تمام حقوق) کی حفاظت کرے۔“ ضعیف۔ [مشكوة المصابيح/كتاب الزكاة/حدیث: 1781]