انس رضی اللہ عنہ نبی صلی ‌اللہ ‌علیہ ‌وآلہ ‌وسلم سے روایت کرتے ہیں، آپ صلی ‌اللہ ‌علیہ ‌وآلہ ‌وسلم نے فرمایا: ”میری امت میں سے میری امت پر سب سے زیادہ مہربان ابوبکر رضی اللہ عنہ ہیں، اللہ کے دین کے معاملے میں سب سے زیادہ سخت عمر رضی اللہ عنہ ہیں، ان میں سے سب سے زیادہ با حیا عثمان رضی اللہ عنہ ہیں، علم میراث کے سب سے بڑے عالم زید بن ثابت رضی اللہ عنہ ہیں، سب سے بڑے قاری ابی بن کعب رضی اللہ عنہ ہیں، حلال و حرام کے متعلق سب سے زیادہ علم رکھنے والے معاذ بن جبل رضی اللہ عنہ ہیں، اور ہر امت کا ایک امین ہوتا ہے اور اس امت کے امین ابوعبیدہ بن جراح رضی اللہ عنہ ہیں۔“ احمد، ترمذی رحمہما اللہ، اور انہوں نے فرمایا: یہ حدیث حسن صحیح ہے۔ «إِسْنَادُهُ صَحِيحٌ، رَوَاهُ أَحْمَدُ وَالتِّرْمِذِيُّ» ”اس کی سند صحیح ہے، اسے احمد اور ترمذی نے روایت کیا ہے۔“ اور معمر سے قتادہ کی سند سے مرسل روایت ہے، اور اس میں ہے: ”قضا میں سب سے زیادہ عالم علی رضی اللہ عنہ ہیں۔“ [مشكوة المصابيح/كتاب المناقب/حدیث: 6120]