حضرت اسامہ رضی اللہ عنہ سے روایت ہے انہوں نے کہا: نبی صلی اللہ علیہ وسلم کی ایک صاحبزادی رضی اللہ عنہا کا بیٹا فوت ہو رہا تھا تو انہوں نے آپ صلی اللہ علیہ وسلم کو تشریف لانے کے لیے پیغام بھیجا۔ آپ صلی اللہ علیہ وسلم نے جواب کہلا بھیجا: «إِنَّ لِلّٰهِ مَا أَخَذَ، وَلَهُ مَا أَعْطَىٰ، وَكُلُّ شَيْءٍ عِنْدَهُ بِأَجَلٍ مُسَمًّى» ”اللہ ہی کا ہے جو اس نے لے لیا اور اسی کا ہے جو اس نے دیا اور ہر شے ایک مقرر حد تک کے لیے ہے، انہیں چاہیے کہ صبر کریں اور ثواب کی امید رکھیں۔“ صاحبزادی نے دوبارہ پیغام بھیجا اور آپ صلی اللہ علیہ وسلم کو قسم دی کہ ضرور تشریف لائیں۔ چنانچہ رسول اللہ صلی اللہ علیہ وسلم اٹھے اور میں بھی آپ کے ساتھ چلا۔ حضرت معاذ بن جبل رضی اللہ عنہ، حضرت ابی بن کعب رضی اللہ عنہ اور حضرت عبادہ بن صامت رضی اللہ عنہ بھی ساتھ روانہ ہوئے۔ جب ہم صاحبزادی کے گھر داخل ہوئے تو بچے کا سانس اکھڑ رہا تھا۔ وہ پرانی مشک کی طرح تھا، رسول اللہ صلی اللہ علیہ وسلم بچے کی حالت دیکھ کر رو پڑے۔ حضرت سعد بن عبادہ رضی اللہ عنہ نے کہا: ”آپ رو رہے ہیں؟“ رسول اللہ صلی اللہ علیہ وسلم نے فرمایا: ”بس اللہ تعالیٰ رحم کرتا ہے اپنے رحم کرنے والے بندوں پر۔“ [صحيح البخاري/كِتَاب التَّوْحِيدِ/حدیث: 7448]

حضرت ابو ہریرہ رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”جنت اور دوزخ نے اپنے رب کے پاس جھگڑا کیا۔ جنت نے کہا: ”اے میرے رب! اس کا کیا حال ہے کہ اس میں صرف کمزور لوگ اور گرے پڑے فقیر ہی داخل ہوں گے؟“ دوزخ نے کہا: ”اے میرے رب! میں تو متکبرین کے لیے خاص کی گئی ہوں۔“ اس پر اللہ تعالیٰ نے جنت سے فرمایا: ”تو میری رحمت ہے۔“ دوزخ سے فرمایا: ”تو میرا عذاب ہے۔ تیرے ذریعے سے میں جسے چاہوں گا عذاب دوں گا۔ تم دونوں میں سے ہر ایک کو بھرنا ہے۔“ جہاں تک جنت کا تعلق ہے تو اللہ تعالیٰ اپنی مخلوق میں سے کسی پر ظلم نہیں کرے گا اور دوزخ کے لیے جو چاہے گا (موقع پر) پیدا کر دے گا، پھر انہیں دوزخ میں ڈالا جائے گا۔ اس کے بعد بھی دوزخ کہے گی: ”ابھی اور بھی گنجائش ہے۔“ تین بار ایسا ہوگا۔ آخر کار اللہ تعالیٰ اپنا پاؤں اس میں رکھ دے گا تو وہ بھر جائے گی۔ اس کے کچھ حصے دوسروں سے مل جائیں گے اور وہ کہے گی: ”بس، بس اور بس (میں اب بھر گئی ہوں)۔““ [صحيح البخاري/كِتَاب التَّوْحِيدِ/حدیث: 7449]

حضرت انس رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”کچھ لوگ ان گناہوں کی پاداش میں جو انہوں نے کیے ہوں گے آگ سے جھلس جائیں گے، پھر اللہ تعالیٰ اپنی رحمت کے فضل سے انہیں جنت میں داخل کرے گا، ایسے لوگوں کو جہنمی کہا جائے گا۔“ ہمام نے کہا: ہمیں قتادہ نے خبر دی، انہوں نے کہا: مجھ سے حضرت انس رضی اللہ عنہ نے نبی صلی اللہ علیہ وسلم کے حوالے سے بیان کیا۔ [صحيح البخاري/كِتَاب التَّوْحِيدِ/حدیث: 7450]