حضرت عروہ اس بات کو پسند فرماتے تھے کہ آدمی جب بھی سوئے باوضو ہو کر سوئے۔ [مصنف ابن ابي شيبه/كتاب الطهارة/حدیث: 1270]

حضرت حسن اس بات کو پسند فرماتے تھے کہ آدمی جب بھی سوئے باوضو ہو کر سوئے۔ [مصنف ابن ابي شيبه/كتاب الطهارة/حدیث: 1271]

حضرت عکرمہ فرماتے ہیں کہ جو شخص اللہ کا ذکر کرتے ہوئے باوضو ہو کر سوئے اس کا بستر اٹھنے تک اس کے لیے مسجد کے حکم میں ہے۔ [مصنف ابن ابي شيبه/كتاب الطهارة/حدیث: 1272]

حضرت مجاہد فرماتے ہیں کہ اگر تم سے ہو سکے تو اللہ کا ذکر کرتے ہوئے، اپنے گناہوں پر استغفار کرتے ہوئے باوضو ہو کر سوؤ، کیونکہ ہمیں یہ بات پہنچی ہے کہ روحوں کو اسی حال میں اٹھایا جائے گا جس حال میں انہیں قبض کیا گیا۔ [مصنف ابن ابي شيبه/كتاب الطهارة/حدیث: 1273]

حضرت ابو صالح حنفی فرماتے ہیں جب آدمی باوضو ہو کر اپنے بستر کی طرف آتا ہے تو فرشتے اس کے بستر کو ہاتھ لگاتے ہیں۔ [مصنف ابن ابي شيبه/كتاب الطهارة/حدیث: 1274]

حضرت ابو امامہ فرماتے ہیں کہ جو شخص باوضو ہو کر سوئے اور رات کو اس کی آنکھ کھلے تو دنیا و آخرت کی جو چیز وہ اللہ تعالیٰ سے مانگے گا اللہ تعالیٰ اسے عطا فرمائیں گے۔ [مصنف ابن ابي شيبه/كتاب الطهارة/حدیث: 1275]

حضرت ابن عباس رضی اللہ عنہما جب رات کو بیدار ہوتے تو تیمم فرماتے تھے۔ [مصنف ابن ابي شيبه/كتاب الطهارة/حدیث: 1276]

حضرت عمرو بن عبسہ فرماتے ہیں کہ جب کوئی شخص باوضو ہو کر بستر پر لیٹے اور سونے تک اللہ کا ذکر کرتا رہے اور بیدار ہو کر سب سے پہلے یہ کہے ”اے اللہ! تو پاک ہے، تیرے سوا کوئی معبود نہیں، تو میری مغفرت فرما“ تو وہ گناہوں سے ایسے نکل جاتا ہے جیسے سانپ اپنی کھال سے نکل جاتا ہے۔ [مصنف ابن ابي شيبه/كتاب الطهارة/حدیث: 1277]