حضرت ابن عمر رضی اللہ عنہما فرماتے ہیں کہ جب کبھی بارش یا آندھی ہوتی تو نبی صلی اللہ علیہ وآلہ وسلم ایک اعلان کرنے والے کو حکم دیتے کہ وہ اعلان کرے ”اپنے کجاو وں میں نماز پڑھو“۔ [مصنف ابن ابي شيبه/كتاب صلاة التطوع والإمامة/حدیث: 6407]

حضرت ابو ملیح کے والد فرماتے ہیں کہ حدیبیہ یا حنین والے سال میں نبی صلی اللہ علیہ وآلہ وسلم کے ساتھ تھا۔ اس دوران ایک دن اتنی بارش ہوئی کہ ہمارے جوتوں کے تلوے گیلے نہیں ہوئے۔ آپ نے ایک اعلان کرنے والے کو حکم دیا اس نے اعلان کیا کہ اپنے کجاو وں میں نماز پڑھ لو۔ [مصنف ابن ابي شيبه/كتاب صلاة التطوع والإمامة/حدیث: 6408]

حضرت ابو رجاء فرماتے ہیں کہ ایک دن حضرت ابن عباس رضی اللہ عنہما کے زمانے میں جمعہ کے دن بارش ہوئی، انہوں نے ایک اعلان کرنے والے کو حکم دیا کہ وہ یہ اعلان کرے نماز اپنے کجاو وں میں پڑھ لو۔ [مصنف ابن ابي شيبه/كتاب صلاة التطوع والإمامة/حدیث: 6409]

حضرت ابو ملیح فرماتے ہیں کہ ایک مرتبہ بارانی رات میں میں نماز کے لئے مسجد میں گیا، واپس آ کر میں نے دروازہ کھٹکھٹایا تو والد صاحب نے پوچھا کون ہے؟ گھر والوں نے بتایا کہ ابو ملیح ہے۔ انہوں نے فرمایا کہ غزوہ حدیبیہ کے موقع پر حضور صلی اللہ علیہ وآلہ وسلم کے ساتھ تھا۔ اتنے میں بارش ہوئی جو اتنی تھی کہ ہمارے جوتوں کے تلوے گیلے نہیں ہوئے۔ لیکن حضور صلی اللہ علیہ وآلہ وسلم کے ایک منادی نے اعلان کیا کہ اپنے کجاو وں میں نماز پڑھ لو۔ [مصنف ابن ابي شيبه/كتاب صلاة التطوع والإمامة/حدیث: 6410]

حضرت سمرہ فرماتے ہیں کہ حنین کے دن بارش ہوئی تو حضور صلی اللہ علیہ وآلہ وسلم نے اپنے منادی کو حکم دیا کہ کجاو وں میں نماز پڑھے جانے کا اعلان کر دے۔ [مصنف ابن ابي شيبه/كتاب صلاة التطوع والإمامة/حدیث: 6411]