حضرت ابو ذر فرماتے ہیں کہ اگر میں اپنی بیوی سے جماع کرنے کی وجہ سے جنبی ہوجاؤں اور اسی حال میں صبح کروں تو میں روزہ رکھوں گا۔ [مصنف ابن ابي شيبه/كتاب الصيام/حدیث: 9831]

حضرت عائشہ رضی اللہ عنہا اور حضرت ام سلمہ فرماتی ہیں کہ نبی کریم صلی اللہ علیہ وآلہ وسلم اپنی ازواج سے ازدواجی ملاقات کی وجہ سے حالت جنابت میں صبح کرتے تو غسل کرکے روزہ رکھ لیتے۔ [مصنف ابن ابي شيبه/كتاب الصيام/حدیث: 9832]

حضرت ابن عمر رضی اللہ عنہما فرماتے ہیں کہ اگر کوئی اعلان کرنے والا صبح کا اعلان کردے اور میں اپنی بیوی کے ساتھ ازدواجی ملاقات میں مشغول ہوں تو میں اٹھ جاؤں گا اور روزے کو پورا کروں گا خواہ یہ رمضان کا روزہ ہو یا کوئی دوسرا۔ [مصنف ابن ابي شيبه/كتاب الصيام/حدیث: 9833]

حضرت منصور اور حضرت حسن فرماتے ہیں کہ حالت جنابت میں روزہ رکھنا نفل میں تو جائز ہے البتہ فرض میں اس روزے کی قضا کرے گا۔ [مصنف ابن ابي شيبه/كتاب الصيام/حدیث: 9834]

حضرت ہشام بن عروہ فرماتے ہیں کہ اس پر قضاء لازم ہے۔ [مصنف ابن ابي شيبه/كتاب الصيام/حدیث: 9836]

حضرت سعید بن مسیب فرماتے ہیں کہ حضرت ابوہریرہ نے اپنے اس فتوے سے رجوع کرلیا تھا کہ جس شخص نے حالت جنابت میں صبح کی اس کا روزہ نہیں ہوا۔ [مصنف ابن ابي شيبه/كتاب الصيام/حدیث: 9837]

حضرت طاوس فرماتے ہیں کہ اگر کوئی ماہِ رمضان میں جنابت کا شکار ہوا، اب اگر وہ بیدار ہوا اور اس نے صبح تک غسل نہ کیا تو وہ اس دن بھی روزے کو پورا کرے اور اس دن کے بدلے روزہ رکھے۔ اگر وہ صبح ہونے کے بعد بیدار ہوا تو اس پر بدل لازم نہیں۔ [مصنف ابن ابي شيبه/كتاب الصيام/حدیث: 9838]

حضرت عبد اللہ فرماتے ہیں کہ مؤذن اذان دے اور میں اپنی بیوی کے ساتھ جماع میں مشغول ہوں تو میں غسل کرکے روزہ رکھ لوں گا۔ [مصنف ابن ابي شيبه/كتاب الصيام/حدیث: 9839]

حضرت عمر فرماتے ہیں کہ مؤذن اذان دے اور میں اپنی بیوی کے ساتھ جماع میں مشغول ہوں تو میں غسل کرکے روزہ رکھ لوں گا۔ [مصنف ابن ابي شيبه/كتاب الصيام/حدیث: 9840]