حضرت عمرو بن ھرم فرماتے ہیں کہ میں نے حضرت جابر بن زید سے زیورات پر زکوٰۃ کے متعلق دریافت کیا؟ آپ نے فرمایا جی ہاں جب وہ بیس مثقال یا دو سو درھم کے بقدر ہوں تو پھر زکوٰۃ ہے۔ [مصنف ابن ابي شيبه/كتاب الزكاة/حدیث: 10451]

حضرت ابو خالد الاحمر سے مروی ہے کہ حضرت حجاج، حضرت عطاء، حضرت زہری اور حضرت مکحول فرماتے ہیں کہ زیورات پر زکوٰۃ ہے، فرماتے ہیں کہ سنت میں یہ بات گذر چکی ہے کہ سونے چاندی کے زیورات پر زکوٰۃہے۔ [مصنف ابن ابي شيبه/كتاب الزكاة/حدیث: 10452]

حضرت عبد اللہ بن شداد فرماتے ہیں کہ زیورات پر زکوٰۃ ہے یہاں تک کہ انگوٹھی پر بھی ہے۔ [مصنف ابن ابي شيبه/كتاب الزكاة/حدیث: 10453]

حضرت جعفر بن میمون فرماتے ہیں کہ ہمارے پاس ایک ہار تھا اور ہم نے اسکی زکوٰۃ ادا کردی تھی یہاں تک کہ اسکو دیکھا کہ وہ اپنی قیمت پر آگئی تھی۔ [مصنف ابن ابي شيبه/كتاب الزكاة/حدیث: 10454]

حضرت عطاء فرماتے ہیں کہ جب زیورات اس مقدار کو پہنچ جائیں جس پر زکوٰۃ آتی ہے تو پھر ان (زیورات پر بھی) زکوٰۃ آئے گی۔ [مصنف ابن ابي شيبه/كتاب الزكاة/حدیث: 10455]