حضرت نعمان بن ملک فرماتے ہیں کہ میں نے حج تمتع کیا تو میں حضرت ابن عباس رضی اللہ عنہما کے پاس آیا اور ان سے عرض کیا کہ میں نے حج تمتع کیا ہے؟ آپ نے فرمایا: { مَا اسْتَیْسَرَ مِنَ الْہَدْیِ } میں نے عرض کیا بکری؟ آپ نے فرمایا ہاں بکری۔ [مصنف ابن ابي شيبه/كتاب الحج/حدیث: 13211]

حضرت ابن عمر رضی اللہ عنہما فرماتے ہیں { مَا اسْتَیْسَرَ مِنَ الْہَدْیِ } (جو ھدی میسر ہو) اس سے مراد بکری ہے۔ [مصنف ابن ابي شيبه/كتاب الحج/حدیث: 13212]

حضرت ابن عمر رضی اللہ عنہما فرماتے ہیں کہ اللہ کے ارشاد { مَا اسْتَیْسَرَ مِنَ الْہَدْیِ } سے مراد سستا جانور سے لے کر مہنگا جانور سب شامل ہیں۔ [مصنف ابن ابي شيبه/كتاب الحج/حدیث: 13213]

حضرت ابراہیم فرماتے ہیں کہ ما استیسر من الھدی۔ سے مراد بکری ہے۔ [مصنف ابن ابي شيبه/كتاب الحج/حدیث: 13215]

حضرت زہری سے دریافت کیا گیا کہ { مَا اسْتَیْسَرَ مِنَ الْہَدْیِ } سے کیا مراد ہے؟ آپ نے فرمایا: حضرت ابن عمر رضی اللہ عنہما فرماتے تھے گائے اور اونٹ مراد ہے اور حضرت ابن عباس رضی اللہ عنہما فرماتے تھے بکری مراد ہے۔ [مصنف ابن ابي شيبه/كتاب الحج/حدیث: 13216]

حضرت علقمہ فرماتے ہیں کہ اس سے مراد بکری ہے۔ [مصنف ابن ابي شيبه/كتاب الحج/حدیث: 13218]

حضرت ابن عمر رضی اللہ عنہما فرماتے ہیں ک جب کوئی شخص حج اور عمرہ میں قران کرے تو اس پر اونٹ ہے، ان سے کہا گیا کہ حضرت ابن مسعود تو فرماتے تھے بکری ہے، حضرت ابن عمر رضی اللہ عنہما نے فرمایا: روزے میرے نزدیک بکری سے زیادہ پسندیدہ ہیں۔ [مصنف ابن ابي شيبه/كتاب الحج/حدیث: 13219]

حضرت عائشہ رضی اللہ عنہا اور حضرت ابن عمر رضی اللہ عنہما فرماتے ہیں کہ ھدی اونٹ اور گائے میں سے ہو۔ [مصنف ابن ابي شيبه/كتاب الحج/حدیث: 13220]