حضرت عکرمہ فرماتے ہیں کہ لوگ بغیر زاد راہ مکہ مکرمہ آ جایا کرتے تھے، پھر یہ آیت نازل ہوئی { وَ تَزَوَّدُوْا فَاِنَّ خَیْرَ الزَّادِ التَّقْوٰی }۔ [مصنف ابن ابي شيبه/كتاب الحج/حدیث: 14383]

حضرت عبد الملک فرماتے ہیں کہ میں نے حضرت شعبی سے اللہ تعالیٰ کے ارشاد { وَ تَزَوَّدُوْا فَاِنَّ خَیْرَ الزَّادِ التَّقْوٰی } کے متعلق دریافت کیا؟ آپ نے فرمایا اس سے مراد کھانا ہے اور کھانا آج کل بہت کم ہوتا ہے میں نے عرض کیا کھانا کیا ہو؟ آپ نے فرمایا ستو اور کھجور۔ [مصنف ابن ابي شيبه/كتاب الحج/حدیث: 14384]

حضرت سعید بن جبیر فرماتے ہیں کہ قرآن پاک کی آیت، وَ تَزَوَّدُوْا سے مراد روٹی اور ستو ہے۔ [مصنف ابن ابي شيبه/كتاب الحج/حدیث: 14385]

حضرت شعبی فرماتے ہیں کہ یمن کے لوگ جب حج کے لیے تشریف لاتے تو زاد راہ نہ لاتے یہاں تک کہ فلاں فلاں گھاٹی تک پہنچ جاتے، پھر یہ آیت نازل ہوئی { وَ تَزَوَّدُوْا فَاِنَّ خَیْرَ الزَّادِ التَّقْوٰی }۔ [مصنف ابن ابي شيبه/كتاب الحج/حدیث: 14386]

حضرت مجاہد فرماتے ہیں کہ لوگ حج میں زاد راہ لے کر نہ آتے یہاں تک کہ یہ آیت نازل ہوئی { وَ تَزَوَّدُوْا فَاِنَّ خَیْرَ الزَّادِ التَّقْوٰی } پھر انھوں نے کھانا ساتھ لانا شروع کردیا۔ [مصنف ابن ابي شيبه/كتاب الحج/حدیث: 14387]