حضرت طارق فرماتے ہیں کہ میری عورت نے طواف کیا اور دو رکعتیں ادا کیں، اس کے بعد اس کو صفا ومروہ کی سعی سے پہلے ہی حیض آگیا، میں نے اس کو حکم دیا کہ تو صفا ومروہ کی سعی کر، جب میں اس کو حکم دے رہا تھا اس وقت ایک خاتون یہ سن رہی تھی، اس خاتون نے کہا کہ تو نے اس کو بہت اچھا حکم دیا ہے، بیشک میری پھوپھی اور میری خالہ حضرت عائشہ رضی اللہ عنہا اور حضرت ام سلمہ جو رسول اکرم (صلی اللہ علیہ وآلہ وسلم) کی زوجہ مطہرہ ہیں وہ فرماتی تھیں کہ جب عورت طواف کرے پھر دو رکعتیں بھی ادا کرے اس کے بعد اس کو حیض آجائے تو اس کو چاہئے کہ وہ صفا ومروہ کی سعی بھی کرلے۔ [مصنف ابن ابي شيبه/كتاب الحج/حدیث: 14969]

حضرت ابن عمر رضی اللہ عنہما فرماتے ہیں کہ جب خاتون بیت اللہ کا طواف کرلے پھر اس کو سعی سے پہلے حیض آجائے تو اس کو چاہئے کہ وہ صفا ومروہ کی سعی کرلے۔ [مصنف ابن ابي شيبه/كتاب الحج/حدیث: 14970]

حضرت حجاج فرماتے ہیں کہ میں نے حضرت عطاء سے دریافت کیا کہ اگر عورت کو طواف کے بعد حیض آجائے؟ آپ نے فرمایا کہ وہ صفا ومروہ کی سعی کرے۔ [مصنف ابن ابي شيبه/كتاب الحج/حدیث: 14971]

حضرت حسن اور حضرت عطاء فرماتے ہیں کہ وہ صفا ومروہ کی سعی کرے گی۔ [مصنف ابن ابي شيبه/كتاب الحج/حدیث: 14972]

حضرت ابراہیم، حضرت حکم اور حضرت حماد فرماتے ہیں کہ وہ صفا ومروہ کی سعی کرے گی۔ [مصنف ابن ابي شيبه/كتاب الحج/حدیث: 14973]