حضرت ابن عمر رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: پانچ جانور ایسے ہیں کہ اگر محرم ان کو مار دے تو اس پر کوئی گناہ نہیں، چوہا، بچھو، کوا، چیل اور کاٹ کھانے والا کتا۔ [مصنف ابن ابي شيبه/كتاب الحج/حدیث: 15480]

ایک شخص نے حضرت ابن عمر رضی اللہ عنہما سے دریافت کیا کہ محرم کون سے جانوروں کو مار سکتا ہے؟ آپ نے فرمایا کہ مجھ سے ازواج مطہرات میں سے ایک نے حدیث بیان فرمائی کہ نبی کریم صلی اللہ علیہ وآلہ وسلم نے حکم فرمایا کہ چوہے، بچھو کاٹ کھانے والے کتے، چیل اور کوے کو مار دو۔ [مصنف ابن ابي شيبه/كتاب الحج/حدیث: 15481]

حضرت سعید بن المسیب ارشاد فرماتے ہیں کہ محرم شخص پانچ جانوروں کو مار سکتا ہے، بچھو، سانپ، بھیڑیا، کوا اور کتا۔ [مصنف ابن ابي شيبه/كتاب الحج/حدیث: 15482]

حضرت ابن عباس رضی اللہ عنہما ارشاد فرماتے ہیں کہ کوئی حرج نہیں محرم آدمی سانپ کو مارے اور چیل کو مارے۔ [مصنف ابن ابي شيبه/كتاب الحج/حدیث: 15483]

حضرت قاسم فرماتے ہیں کہ محرم چھوٹے چوہے کو مار دے گا۔ [مصنف ابن ابي شيبه/كتاب الحج/حدیث: 15486]

حضرت مغیرہ اور حضرت ابراہیم فرماتے ہیں کہ محرم کسی درندے کو نہیں مارے گا سوائے اس کے جو اس پر حملہ کرے۔ [مصنف ابن ابي شيبه/كتاب الحج/حدیث: 15487]

حضرت عطاء فرماتے ہیں کہ کوئی بھی دشمن تجھ پر حملہ کر دے تو اس کو مار دے، اگرچہ تو حالت احرام میں ہو۔ [مصنف ابن ابي شيبه/كتاب الحج/حدیث: 15489]