حضرت مجاہد فرماتے ہیں کہ کعبہ کا نام بیت عتیق اس لیے رکھا گیا ہے کیونکہ اس کو جابروں سے آزاد کیا گیا ہے، پس کوئی جابر یہ نہیں کہہ سکتا کہ خانہ کعبہ میرا ہے۔ [مصنف ابن ابي شيبه/كتاب الحج/حدیث: 16570]

حضرت عکرمہ اور حضرت عطاء اور حضرت طاؤس اللہ تعالیٰ کے ارشاد { فَاجْعَلْ اَفْئِدَۃً مِّنَ النَّاسِ تَھْوِیْ اِلَیْھِمْ } کے متعلق فرماتے ہیں کہ ان کے دل اس کی طرف پھیر دیئے گئے ہوں وہ اس کے پاس آتے ہوں۔ [مصنف ابن ابي شيبه/كتاب الحج/حدیث: 16571]

حضرت سعید بن جبیر اللہ تعالیٰ کے ارشاد { جَعَلَ اللّٰہُ الْکَعْبَۃَ الْبَیْتَ الْحَرَامَ قِیٰمًا لِّلنَّاسِ } کے متعلق فرماتے ہیں کہ ان کے دین و مذہب کی شدت کی وجہ سے۔ [مصنف ابن ابي شيبه/كتاب الحج/حدیث: 16572]

حضرت مجاہد فرماتے ہیں کہ کعبہ کا نام کعبہ اس لیے رکھا گیا ہے کیونکہ مربع ہے، بدنہ کو بدنہ اس لیے کہتے ہیں کیونکہ یہ موٹے ہوتے ہیں۔ [مصنف ابن ابي شيبه/كتاب الحج/حدیث: 16573]

حضرت سعید بن جبیر اللہ تعالیٰ کے ارشاد { وَ اِذْ جَعَلْنَا الْبَیْتَ مَثَابَۃً لِّلنَّاسِ } کے متعلق فرماتے ہیں کہ لوگ حج کے لیے آتے ہیں پھر وہ دوبارہ اس کا اعادہ کرتے ہیں (باربار حج کرتے ہیں)۔ [مصنف ابن ابي شيبه/كتاب الحج/حدیث: 16574]

حضرت عطاء فرماتے ہیں کہ لوگ حج کے لیے آتے ہیں لیکن وہاں اپنا کوئی مقصد اور مطلب پورا نہیں کرتے۔ [مصنف ابن ابي شيبه/كتاب الحج/حدیث: 16575]

حضرت مجاہد فرماتے ہیں کہ اگر یہ نہ کہا ہوتا کہ { فَاجْعَلْ اَفْئِدَۃً مِّنَ النَّاسِ } تو فارس وروم والوں کا اس پر اژدہام ہوجاتا۔ [مصنف ابن ابي شيبه/كتاب الحج/حدیث: 16576]